اسموگ پر قابو پانے میں کچھ سال لگیں گے، وزیراعلی مریم نواز

وزیراعلیٰ پنجاب مریم نواز شریف نے کہا ہے کہ پنجاب میں اسموگ کوئی نیا نہیں بلکہ بہت پرانا مسئلہ ہے اور اس پر قابو پانے میں کچھ سال لگیں گے۔

لندن میں میڈیا سے گفتگو میں مریم نواز نے دعویٰ کیا کہ پنجاب حکومت اسموگ پر قابو پانے کے حوالے سے اقدامات کررہی ہے اور انشاء اللہ چند سالوں بعد اسموگ کنٹرول ہوگی اور مسئلہ حل ہوجائے گا۔

انہوں نے اپنی طبیعت کے حوالے سے بتایا کہ میرا یہاں علاج ہورہا ہے اور اللہ کا شکر ہے کہ ٹھیک ہوں۔ 

مریم نواز نے کہا کہ پاکستان اب مشکلات سے نکلتا ہوا نظر آرہا ہے کیونکہ اب اچھی خبریں اور معیشت بہتر ہورہی ہے، پوری امید ہے کہ پاکستان اس مشکل وقت سے نکل جائے گا، اسٹاک مارکیٹ 96 ہزار کی حد کو چھو گئی اور مہنگائی کم ہورہی ہے۔

انہوں نے دعویٰ کیا کہ نواز شریف کی حکومت کے 7 سال بعد اب مہنگائی کم ہورہی ہے۔