سندھ حکومت نے اوگرا کا گیس کی قیمت بڑھانیکا فیصلہ مستردکردیا

کراچی: سندھ حکومت کی جانب سے  اوگرا کے گیس کی قیمت 25.78فیصد بڑھانے کے فیصلے کو مسترد کردیا گیا ہے۔

ذرائع کے مطابق صوبائی وزیر توانائی ناصر حسین شاہ کا کہنا تھا کہ وفاقی حکومت  اوگرا  کے فیصلے پر عملدرآمد سے قبل صوبوں سے مشاورت کرے۔ مہنگائی کے پسے عوام میں مزید بوجھ اٹھانے کی سکت نہیں ہے۔

واضح رہے کہ  اوگرا کی جانب سے  گزشتہ روز رواں مالی سال کے لیے گیس کی قیمت بڑھانے کی منظوری دی گئی تھی۔

اوگرا کے اعلامیے میں کہا گیا ہے کہ سوئی ناردرن کے لیے گیس کی قیمت میں 8.71 فیصد جب کہ سوئی سدرن کے لیے گیس کی قیمت میں 25.78فیصد اضافے کی منظوری دی گئی ہے۔

اوگرا کے مطابق سوئی ناردرن کے لیے گیس کی اوسط قیمت 1778روپے 35 پیسے فی ایم ایم بی ٹی یو مقرر کرنے کی منظوری دی گئی ہے جب کہ سوئی سدرن کے لیے گیس کی اوسط قیمت 1762 روپے 51 پیسے فی ایم ایم بی ٹی یو مقرر کرنے کی منظوری دے دی گئی ہے۔