سانحہ 9 مئی، عمران خان سمیت 123 رہنماؤں کے بیرون ملک جانے پر پابندی

اسلام آباد: وفاقی حکومت نے تحریکِ انصاف کے کئی اہم رہنماؤں کے بیرونِ ملک سفر پر پابندی عائد کرنے کا فیصلہ کر لیا ہے۔

ذرائع کے مطابق مختلف سیاسی شخصیات کے نام ایگزٹ کنٹرول لسٹ (ای سی ایل) میں ڈالنے کی منظوری دے دی گئی ہے۔

ذرائع کا کہنا ہے کہ جن رہنماؤں کے نام ای سی ایل میں شامل کیے گئے ہیں، ان میں سابق وزیراعظم عمران خان، شاہ محمود قریشی، عمر ایوب، فواد چوہدری اور شبلی فراز شامل ہیں۔

اس کے علاوہ علی امین گنڈاپور، شہریار آفریدی اور عثمان ڈار کے نام بھی شامل کیے گئے ہیں جبکہ شیری مزاری، زرتاج گل، مسرت جمشید چیمہ اور کنول شوزب کے نام بھی پابندی کی فہرست کا حصہ ہیں۔

ذرائع کے مطابق شیخ رشید، شیخ راشد، میجر ریٹائرڈ طاہر صادق، راجہ بشارت اور واثق قیوم عباسی سمیت دیگر شخصیات پر بھی بیرونِ ملک جانے پر پابندی لگانے کا فیصلہ کیا گیا ہے۔

محکمہ داخلہ پنجاب نے ملزمان کے نام ای سی ایل میں شامل کرنے کی سفارش وفاقی حکومت کو ارسال کی تھی۔

ذرائع کے مطابق ای سی ایل کمیٹی کی سفارشات وفاقی حکومت کو بھجوائی گئی تھیں، جس کے بعد باقاعدہ منظوری کا عمل شروع کر دیا گیا ہے۔