سنی اتحاد کونسل کا قومی اسمبلی میں مخصوص نشستیں لینے سے انکار

سنی اتحاد کونسل کے سربراہ صاحبزادہ حامد رضا نے الیکشن کمیشن کو خط لکھ کر قومی اسمبلی مین مخصوص نشستیں لینے سے انکار کردیا۔

الیکشن کمیشن نے سنی اتحاد کونسل کی مخصوص نشستوں سے متعلق درخواستوں کی سماعت کی۔

درخواست کی پیروی کیلیے بیرسٹر گوہر علی خان اور صاحبزادہ حامد رضا کمیشن میں پیش ہوئے۔ اس دوران انکشاف ہوا کہ سنی اتحاد کونسل کے سربراہ نے الیکشن کمیشن کو خط لکھا جس میں انہوں نے مخصوص نشستیں لینے سے انکار کردیا ہے۔

چیف الیکشن کمشنر نے سنی اتحاد کونسل کا خط بیرسٹر علی ظفر کو دے کر کہا کہ سربراہ سنی اتحاد کونسل نے 26 فروری کو الیکشن کمیشن کو خط لکھا اور کہا ہم جنرل الیکشن نہیں لڑے نا مخصوص نشستیں چاہیئیں، سنی اتحاد کونسل کو مخصوص نشستیں نہیں چاہیئیں تو آپ کیوں ان کو مجبور کر رہے ہیں۔

بیرسٹر علی ظفر نے سنی اتحاد کونسل کے خط سے لاعلمی کا اظہار کرتے ہوئے کہا کہ پی ٹی آئی کو سنی اتحاد کونسل نے ایسے کسی خط کے حوالے سے نہیں بتایا۔

کیس میں تمام فریقین کے دلائل مکمل ہونے پر الیکشن کمیشن نے فیصلہ محفوظ کر لیا۔