سیکیورٹی فورسز نے خودکش دھماکے کیلیے تیار کی گئی گاڑی تباہ کردی، 3 خوارج ہلاک

سیکیورٹی فورسز نے ایک بڑی دہشت گردی کی کارروائی ناکام بناتے ہوئے بھارتی حمایت یافتہ 3 خوراج کو ہلاک، جبکہ خودکش دھماکے کے لیے تیار گاڑی کو تباہ کردیا۔

پاک فوج کے شعبہ تعلقات عامہ (آئی ایس پی آر) کے مطابق قابلِ اعتماد خفیہ معلومات کی بنیاد پر اطلاع ملی تھی کہ بھارت کے حمایت یافتہ خوارج گروہ “فتنہ الخوارج” شمالی وزیرستان کے علاقے جھلار میں ایک گاڑی کو خودکش حملے کے لیے تیار کر رہے ہیں۔

سیکیورٹی فورسز نے بروقت اور خفیہ اطلاعات پر مبنی کارروائی  کرتے ہوئے خوارج کے ٹھکانے کو مؤثر انداز میں نشانہ بنایا، انتہائی مہارت سے کی گئی کارروائی کے نتیجے میں وہ گاڑی تباہ کر دی گئی جو خودکش حملے کے لیے تیار کی جا رہی تھی۔

سیکیورٹی فورسز کی کارروائی میں تین بھارتی سرپرستی یافتہ خوارج بھی مارے گئے، علاقے میں تلاشی کا عمل جاری ہے تاکہ کسی بھی دیگر بھارتی حمایت یافتہ دہشت گرد کو بھی ختم کیا جا سکے۔

اعلامیے میں کہا گیا ہے کہ سیکیورٹی فورسز اور قانون نافذ کرنے والے ادارے “عزمِ استحکام” کے ویژن کے تحت اپنی انسدادِ دہشت گردی مہم کو پوری قوت سے جاری رکھیں گے تاکہ ملک سے غیر ملکی حمایت یافتہ دہشت گردی کے ناسور کا مکمل خاتمہ کیا جا سکے، ہماری بہادر افواج کی قربانیاں ہمارے عزم کو مزید مضبوط کرتی ہیں۔