کوریئر کمپنی کے نام پر شہریوں کے ساتھ مالی فراڈ، نوسربازوں کا طریقہ واردات کیا ہے؟

پاکستان ٹیلی کمیونیکیشن اتھارٹی (پی ٹی اے) نے کوریئر سروس کا نمائندہ بن کر فراڈ کرنے والوں کے خلاف کارروائی شروع کر دی ہے۔

پی ٹی اے نے ساتھ ہی عوام کو خبردار کیا ہے کہ شہری کوریئر سروسز کے نمائندے کی جانب سے موصول پیغامات سے ہوشیار رہیں۔

پی ٹی اے کی جانب سے جاری کردہ اعلامیہ کے مطابق ترجمان پی ٹی اے کا کہنا ہے کہ اتھارٹی کی جانب سے عوام الناس کو ایسے جعلی پیغامات سے محتاط رہنے کو کہا جاتا ہے۔

اعلامیے میں کہا گیا ہے کہ کوریئر سروسز کے نمائندے کی جانب سے صارف کو فون کال کے ذریعے ویریفکیشن کوڈ سے متعلق معلومات طلب کی جا رہی ہیں۔

ترجمان نے کہا کہ ایس ایم ایس یا میسجنگ ایپس کے ذریعے موصول ہونے والا کوئی بھی کوڈ کسی کے ساتھ ہر گز شیئر نہ کریں کیونکہ یہ کوڈ آپ کے اکاوٴنٹس یا ڈیجیٹل شناخت تک غیر مجاز رسائی کے لیے استعمال کیا جا سکتا ہے۔

پی ٹی اے نے کہا کہ مستند کوریئر کمپنیاں پارسل کی ترسیل کے لیے صارفین سے کسی قسم کے کوڈ سے متعلق معلومات طلب نہیں کرتیں۔

واضح رہے کہ پی ٹی اے صارفین کو ڈیجیٹل فراڈ سے محفوظ رکھنے کے لیے پرعزم ہے، عوام الناس سے گزارش ہے کہ کسی بھی پیغام پر عمل کرنے سے پہلے اس کی تصدیق ضرور کریں۔