اے آئی اور سوشل میڈیا استعمال کرنے کیلیے 16 سال کی عمر لازمی قرار دینے پر غور

یورپی یونین نے سوشل میڈیا اور مصنوعی ذہانت کے پلیٹ فارمز پر نئی پابندیاں لگانے پر غور شروع کردیاہے۔

بین الاقوامی میڈیا رپورٹس کے مطابق یورپی پارلیمنٹ نے ایک قرارداد منظور کی ہے جس میں پورے یورپ میں سوشل میڈیا، ویڈیو شیئرنگ سائٹس اور اے آئی چیٹ بوٹس کے استعمال کے لیے کم از کم عمر 16 سال مقرر کرنے کی سفارش کی گئی ہے۔

قرارداد کے تحت 13 سے 16 سال کے نوجوان ان خدمات تک تب ہی رسائی حاصل کرسکیں گے جب ان کے والدین یا سرپرست اجازت دیں گے، جبکہ 13 سال سے کم عمر بچوں کے لیے استعمال مکمل طور پر ممنوع ہوگا۔

نئے قواعد میں ایسے اے آئی ماڈلز پر بھی سخت نگرانی یا پابندی کی بات کی گئی ہے جو شہریوں کی سلامتی، پرائیویسی یا بنیادی حقوق کے لیے خطرہ بن سکتے ہیں۔

یورپی یونین کا کہنا ہے کہ ان ضوابط کا مقصد آن لائن پلیٹ فارمز کو زیادہ ذمہ دار بنانا اور اے آئی کے ممکنہ غلط استعمال کو روکنا ہے۔

یورپی اداروں نے واضح کیا ہے کہ سوشل میڈیا اور آن ڈیمانڈ میڈیا پلیٹ فارمز کا نئے معیارات کی روشنی میں  خصوصاً وہ پلیٹ فارمز جو اشتہارات اور اے آئی ٹولز پر چلتے ہیں ان کے حوالے سے پالیسی کا جائزہ لینے کی ضرورت ہے۔