چاند دوسرے دن کا، ایک روزہ کھا لیا، علما پر تنقید کرنے والے شہری کیخلاف پیکا ایکٹ کے تحت مقدمہ درج

رمضان المبارک کے چاند کے حوالے سے نازیبا بیان دینے پر شہری کے خلاف مقدمہ درج

بنوں: رمضان المبارک کے چاند کے اعلان کو لے کر سوشل میڈیا پر ویڈیو بنا کر علما پر تنقید کرنے والے شہری کے خلاف پولیس نے پیکا ایکٹ کے تحت مقدمہ درج کرلیا۔

تفصیلات کے مطابق بنوں میں رمضان المبارک کا چاند نظر نہ آنے کے باعث روزے کا اعلان نہ کرنے پر ایک شہری نے علما کے خلاف سوشل میڈیا پر اسٹیٹس اور ویڈیو اپ لوڈ کی جس میں سخت زبان کا استعمال کیا گیا۔

اس واقعے کے بعد پولیس نے علما کی مدعیت میں ملزم کے خلاف پیکا ایکٹ کے تحت مقدمہ درج کر دیا ہے۔  

آئمہ مساجد کے امیر مولانا عبدالغفار قریشی کی جانب سے شکایت پر یہ مقدمہ درج کیا گیا ہے۔ جس میں ملزم پر الزام عائد کیا گیا ہے کہ اس نے فیس بک پر علما کے خلاف نازیبا اور توہین آمیز الفاظ استعمال کیے۔  

ملزم کا کہنا تھا کہ چاند دو روز کا تھا، لیکن علما نے ایک روزہ چاند چھپایا ہے۔ تاہم، اس کے اس بیان کو سوشل میڈیا پر نازیبا انداز میں پیش کرنے پر علما اور عوام میں شدید ناراضی پائی گئی۔  

پولیس کے مطابق، ملزم کے خلاف قانونی کارروائی شروع کر دی گئی ہے اور معاملے کی تفتیش جاری ہے۔ پولیس نے عوام سے اپیل کی ہے کہ وہ مذہبی معاملات پر حساسیت کا مظاہرہ کریں اور سوشل میڈیا پر ایسے بیانات سے گریز کریں جو معاشرتی ہم آہنگی کو متاثر کر سکتے ہوں۔