افطاری کے وقت پڑوسیوں میں جھگڑا، فائرنگ سے 4 افراد جاں بحق

خیبرپختونخوا کے ضلع چارسدہ میں افطار کے وقت پڑوسیوں کے جھگڑے کے دوران فائرنگ سے چار افراد جاں بحق ہوگئے۔

تفصیلات کے مطابق چارسدہ کے تھانہ ترناب کی حدود میں افطاری کے وقت ہمسایوں کے درمیان زبانی تکرار کے بعد ہاتھا پائی ہوئی اور معاملہ فائرنگ تک جا پہنچا۔

فائرنگ کے نتیجے میں ایک فریق کے چار افراد جاں بحق جبکہ دوسرے فریق کے دو لوگ زخمی ہوئے ہیں۔

عینی شاہدین نے بتایا کہ ہمسایوں کے درمیان زبانی تکرار کے بعد فائرنگ کا تبادلہ ہوا۔ پولیس نے لاشوں اور زخمیوں کو ڈی ایچ کیو ہسپتال منتقل کردیا۔

پولیس کا کہنا ہے کہ جائے وقوعہ سے شواہد اکھٹے کرلیے ہیں جبکہ ملزمان کی گرفتاری کیلیے چھاپے بھی مارے جارہے ہیں۔