جعفر ایکسپریس حملہ، کلیئرنس آپریشن میں 30 دہشت گرد ہلاک، 190 مسافر بازیاب

کوئٹہ سے پشاور جانے والی جعفر ایکسپریس حملے کے بعد یرغمال بنائے گئے 190 شہریوں کو سیکیورٹی فورسز نے بازیاب کروالیا جبکہ 27 دہشت گردوں کو ہلاک کردیا۔

سیکیورٹی ذرائع کے مطابق 104 بازیاب مسافروں کو مال گاڑی کے ذریعے کچھ منتقل کردیا گیا ہے جبکہ باقی یرغمالیوں کے پاس خود کش بمبار بیٹھے ہوئے ہیں۔

کالعدم بی ایل اے نے دھمکی دی ہے کہ آپریشن کی صورت میں مسافروں کو قتل کردیا جائے گا جبکہ انہوں نے قیدیوں کی رہائی کے عوض مسافر چھوڑنے کی شرط رکھی ہے۔

ٹرین میں پھنسے مسافروں نے کچھ اسٹیشن پہنچ کر دعوی کیا کہ حملہ آوروں نے خواتین، بزرگ اور بچوں کو رہا کردیا تھا۔ 

رہا ہونے والوں میں سے بیشتر کا تعلق بلوچستان سے ہے۔

گزشتہ روز نامعلوم افراد نے پہلے پٹڑی کو دھماکے سے اڑایا اور جب ٹرین رکی تو فائرنگ کر کے ڈرائیور کو زخمی کیا اور متعدد مسافروں کو یرغمال بنا کر لے گئے تھے۔

بلوچستان حکومت کے مطابق صبح ساڑھے نو بجے ٹرین کوئٹہ سے روانہ ہونے والی ٹرین جب ٹرین گڈالار اور پیرو کنری کے علاقے سے گزری تو وہاں نامعلوم مسلح افراد نے ٹرین پر فائرنگ کردی، نتیجے میں ڈرائیور شدید زخمی ہوگیا۔

دہشت گردوں نے مچھ کی پہاڑیوں میں ٹرین روکی تھی اور مسافروں کو یرغمال بنا کر پہاڑی علاقے میں لے گئے۔ریلوے پولیس نے واقعے کی تصدیق کرتے ہوئے کہا ہے کہ ریل وہیں روک دی گئی ہے، ٹرین میں کم از کم 500 مسافر سوار ہیں، کئی مسافروں کے زخمی ہونے کی بھی اطلاعات ہیں تاہم تصدیق کا عمل جاری ہے۔

ڈی ایس ریلوے کے پی آر او کے مطابق تمام اسپتالوں میں ایمرجنسی نافذ کردی گئی ہے، سبی سے ایمبولینسز جائے وقوع روانہ کردی ہیں۔

سیکیورٹی فورسز کے ذرائع کے مطابق یہ مچھ کی پہاڑیوں کا درمیانی علاقہ ہے جس کا سیکیورٹی فورسز نے محاصرہ کرلیا ہے، مزید کانوائے روانہ کردیے ہیں۔

ملزمان کے فرار ہونے کی فی الحال کوئی اطلاعات نہیں ہیں بلکہ اطلاعات یہ آرہی ہیں کہ ملزمان نے مسافروں کو یرغمال بنالیا ہے اور قابض ہوکر بیٹھ گئے ہیں اور علاقے میں وقفے وقفے سے فائرنگ کا سلسلہ جاری ہے۔

زخمی مسافروں کو سبی اسپتال علاج کیلیے منتقل کردیا گیا ہے۔ ریلوے حکام کا کہنا ہےکہ ٹرین جہاں پر موجود ہے وہاں موبائل نیٹ ورک کام نہی کرتا اس لیے رابطے میں مشکلات کا سامنا ہے، جعفر ایکسپریس 9 بوگیوں پر مشتمل ہے جس میں 500 کے قریب مسافر سوار ہیں، مسافروں اور عملے سے رابطے کی کوشش کی جارہی ہے۔

دوسری جانب سیکیورٹی ذرائع نے کہا ہے کہ آج بولان پاس، ڈھاڈر کے مقام پر دہشت گردوں نے جعفر ایکسپریس پر حملہ کر کے معصوم شہریوں کو ٹارگٹ کیا، دہشت گردوں نے جعفر ایکسپریس کو ٹنل میں روک کر مسافروں کو یرغمال بنایا ہوا ہے، انتہائی دشوار گزار اور سڑک سے دور ہونے کے باوجود، سیکیورٹی فورسز نے علاقے کو گھیرے میں لے کر کلیئرنس آپریشن شروع کر دیا ہے۔

سیکیورٹی ذرائع کے مطابق دہشت گردوں نے معصوم مسافروں کو یرغمال بنا رکھا ہے جن میں اکثریت عورتوں اور بچوں کی ہے، دہشت گرد بیرون ملک  اپنے سہولت کاروں سے رابطے میں ہیں، دہشت گردوں کے خاتمے تک کلیئرنیس آپریشن جاری رہے گا۔

دہشت گردوں کا معصوم مسافروں کو نشانہ بنانا اس بات کی غمازی کرتا ہے کے ان دہشت گردوں کا  دین اسلام، پاکستان اور بلوچستان سے کوئی تعلق نہیں۔

سیکیورٹی ذرائع کے مطابق کلیئرنس آپریشن کے دوران 104 یرغمال مسافروں کو سیکیورٹی فورسز نے دہشت گردوں سے رہا کروا لیا، جن میں 58 مرد، 31 عورتیں اور 15 بچے شامل ہیں۔

سیکیورٹی فورسز نے کلیئرنس آپریشن کے دوران 23 دہشت گردوں کو ہلاک کردیا۔