کراچی، ڈیفنس میں فلیٹ کی چھت سے 17 سالہ لڑکی کی لاش برآمد، 1 ماہ پہلے شادی ہوئی تھی

ایک ماہ قبل ازدواجی بندھن میں بندھنے والی 17 سالہ لڑکی کی کراچی کے علاقے ڈیفنس کے ایک فلیٹ کی چھت سے پھندا لگی لاش برآمد ہوئی ہے۔

پولیس کے مطابق متوفیہ کی شناخت زینب کے نام سے ہوئی ہے، جس کا آبائی تعلق سیالکوٹ سے ہے۔

ابتدائی معلومات کے مطابق زینب کی شادی تقریباً ایک ماہ قبل ہوئی تھی اور وہ چند روز سے اپنے شوہر کی خالہ کے گھر ڈیفنس فیز 5، بدر کمرشل اسٹریٹ نمبر 7A کے قریب واقع ایک فلیٹ میں مقیم تھی۔

پولیس کا کہنا ہے کہ چار منزلہ عمارت کی چھت سے لڑکی کی لاش ملی، جو فرش پر موجود تھی اور اس کے دوپٹے کا پھندا لگا ہوا تھا۔ عمارت کی چوتھی منزل پر زینب کے شوہر کی خالہ کا فلیٹ ہے، جہاں وہ ٹھہری ہوئی تھی۔

واقعے کے وقت مقتولہ کا شوہر گھر پر موجود نہیں تھا۔ پولیس نے شوہر کی خالہ اور کزن کے بیانات قلم بند کرلیے ہیں، جبکہ مزید تفتیش جاری ہے۔

لاش کو ضروری کارروائی کے بعد پوسٹ مارٹم کے لیے جناح ہسپتال منتقل کردیا گیا ہے۔ پولیس کے مطابق موت کی اصل وجہ پوسٹ مارٹم رپورٹ موصول ہونے کے بعد ہی سامنے آئے گی۔