کراچی کے اسپتال میں زیر علاج بچے کی لاش گھر والے چھوڑ کر فرار

کراچی میں قائم قومی ادارہ برائے صحت اطفال میں زیرعلاج بچے کے ورثا انتقال کرجانے پر لاش چھوڑ کر فرار ہوگئے۔

اسپتال انتظامیہ نے لواحقین کے فرار ہونے پر دو سالہ بچے کی لاش کو لاوارث قرار دے کر اسے تدفین کیلیے ایدھی فاؤنڈیشن کے حوالے کردیا۔

انتظامیہ کے مطابق بچے کو کئی روز پہلے ایمرجنسی میں لایا گیا تھا جس کے بعد سے وہ زیر علاج تھا۔ بچے کا دل بند ہونے کی وجہ سے ہفتے کے روز اُس کا انتقال ہوا ہے۔

بچے کے لواحقین کو انتظامیہ کے پاس کوئی ریکارڈ نہیں اور نہ ہی لاش حوالگی کے حوالے سے کوئی سامنے آیا ہے تاہم عینی شاہدین کا کہنا ہے کہ اُن کے خیال میں غربت کی وجہ سے ورثا بچے کی لاش کے اخراجات برداشت سے بچنے کیلیے ایسا قدم اٹھانے پر مجبور ہوئے ہیں۔