کراچی میں 4 روز کے دوران 18 ہزار سے زائد چالان

ٹریفک پولیس نے ای چالان سسٹم کے چوتھے روز کی کارروائی کی تفصیلات جاری کر دیں۔

ترجمان کے مطابق گزشتہ 24 گھنٹوں کے دوران مجموعی طور پر 5 ہزار 791 چالان کیے گئے، جس کے بعد چار روز میں چالانوں کی مجموعی تعداد 18 ہزار 773 تک پہنچ گئی۔

اعداد و شمار کے مطابق سب سے زیادہ خلاف ورزیاں سیٹ بیلٹ نہ باندھنے کی رہیں، جن پر 3 ہزار 546 ڈرائیورز کو چالان کیا گیا۔ اسی طرح بغیر ہیلمٹ موٹرسائیکل چلانے پر 1 ہزار 555 افراد کے چالان ہوئے۔

پولیس کے مطابق 352 سگنل توڑنے، 166 دورانِ ڈرائیونگ موبائل فون استعمال کرنے، 65 اوور اسپیڈنگ، 40 کالے شیشے لگانے اور 19 نو پارکنگ کی خلاف ورزیوں پر بھی کارروائی کی گئی۔

ترجمان کا کہنا ہے کہ ای چالان سسٹم کے تحت کارروائیوں کا مقصد شہریوں کو ٹریفک قوانین کی پابندی کا عادی بنانا اور حادثات میں کمی لانا ہے۔