کراچی میں تیز رفتار واٹر ٹینکر نے ایک اور موٹرسائیکل سوار کو کچل دیا

کراچی: شہر قائد میں تیز رفتار ٹینکرز کی ٹکر سے شہریوں کی ہلاکت کا سلسلہ تھمنے کا نام نہیں لے رہا۔

آج بھی کراچی میں ایک نوجوان ٹینکر سے کچلے جانے کے سبب جان سے ہاتھ دھو بیٹھا۔ پولیس کے مطابق سائٹ ایریا منگھو پیرروڈ پر تیزرفتارواٹرٹینکرنے ایک اورموٹرسائیکل سوار کو کچل دیا، جس کے نتیجے میں نوجوان موقع پرجاں بحق ہوگیا جب کہ پولیس نے واٹرٹینکرکو قبضے میں لے کر اس کے ڈرائیور کو گرفتارکرلیا۔

منگل کی صبح سائٹ اے تھانے کے علاقے سائٹ ایریا منگھو پیر روڈ پر پیش آنے والے حادثے میں جاں بحق نوجوان کی لاش قانونی کارروائی کیلیے ایمبولینس کے ذریعے عباسی شہید اسپتال منتقل کی گئی۔

متوفی نوجوان قصبہ کالونی کا رہائشی اور بنوری ٹاون مدرسے میں زیر تعلیم تھا۔ پولیس نے حادثے کے بعد واٹر ٹینکر کو قبضے میں لے کر اس کے ڈرائیور سرفراز ولد شہباز کو گرفتار کرکے تھانے منتقل کردیا۔

گرفتار واٹرٹینکر ڈرائیورکے خلاف قانونی کارروائی عمل میں لائی جا رہی ہے ۔