کرم میں مسلح جھڑپیں، گزشتہ چوبیس گھنٹوں میں مزید 31 افراد جاں بحق

خیبرپختونخوا کے ضلع کرم کی تحصیل لوئر کرم کے علاقوں میں گزشتہ 24 گھنٹوں کے دوران جھڑپوں میں مزید 31 افراد جاں بحق اور 50 سے زائد زخمی ہوگئے۔

تفصیلات کے مطابق پولیس ذرائع نے بتایا کہ تحصیل لوئر کرم کے علاقے علیزئی اور بگن کے قبائل کے درمیان فائرنگ کا سلسلہ جاری ہے اور بالش خیل، خار کلی اور  کنج علیزئی اور مقبل گاؤں میں مسلح جھڑپیں ہوئیں۔

پولیس ذرائع کے مطابق گزشتہ چوبیس گھنٹوں کے دوران جھڑپوں میں اب تک 31 افراد جاں بحق اور 50 سے زائد افراد زخمی ہوچکے ہیں جن میں خواتین اور بچےبھی شامل ہیں۔

پولیس کے مطابق فریقین کے درمیان لڑائی کا سلسلہ مسافر گاڑیوں پر فائرنگ کے بعد شروع ہوا، گزشتہ روز بگن ، مندوری اور اوچت کے مقام پر مسافرین پر فائرنگ کے نتیجے میں 45 افراد شہید ہوئے تھے جن میں 6 خواتین اور 5 بچے بھی شامل تھے۔