پاکستان میں بچوں سے زیادتی کے کیسز میں خطرناک حد تک اضافہ، 5 ہزار سے زائد کیسز رپورٹ

ملک میں بچوں کے ساتھ جنسی زیادتی کے واقعات میں خطرناک حد تک اضافہ دیکھا گیا ہے۔

غیر سرکاری تنظیم اسسٹین ایبل سوشل ڈیولپمنٹ آرگنائزیشن (SSDO) نے پاکستان کے 4 صوبوں پنجاب ، سندھ ، خیبر پختونخوا اور بلوچستان میں بچوں کے ساتھ جنسی زیادتی کے واقعات پر مبنی 5 سالہ رپورٹ جاری کر دی۔

اس رپورٹ میں 2019 سے 2023 تک کے اعداد و شمار شامل کیے گئے ہیں جس کے مطابق ان سالوں میں 5 ہزار 398 زیادتی کے کیسز رپورٹ ہوئے اور ان میں سے 62 فیصد واقعات پنجاب سے سامنے آئے۔

رپورٹ کے مطابق پنجاب میں ان پانچ سالوں کے دوران 3 ہزار 323 کیسز رپورٹ ہوئے جبکہ خیبرپختونخوا میں 1360، سندھ میں 458 اور بلوچستان میں 257 کیسز سامنے آئے۔

 لاہور میں بچوں سے زیادتی کے سب سے زیادہ 1176 واقعات رپورٹ ہوئے جب کہ خیبرپختونخوا کے کم آبادی والے ضلع کولائی پالس کوہستان میں 84 واقعات رپورٹ ہوئے۔