پاکستان کو مطلوب دہشت گردی اور سنگین جرائم میں ملوث ملزمان اسپین میں گرفتار

اسپین کی حکومت نے پاکستان کو مطلوب دہشت گردی، اغوا برائے تاوان اور ردیگر سنگین جرائم میں ملوث دو ملزمان کو انٹرپول ریڈ وارنٹ کے تحت گرفتار کرکیا، دونوں ملزمان پاکستانی ہیں۔

پاکستان کے وزارت داخلہ کے بیان کے مطابق، نوازش علی ہنجرا اور ہارون اقبال نامی یہ ملزمان طویل عرصے سے پاکستان کے سب سے زیادہ مطلوب مجرموں کی فہرست میں شامل تھے، جن پر متعدد سنگین جرائم میں ملوث ہونے کے الزامات ہیں۔  

ان کی گرفتاری پاکستان کی ان فراریوں کو انصاف کے کٹہرے میں لانے کی کوششوں میں ایک اہم پیشرفت ہے۔  

وزارت داخلہ کے ترجمان کے مطابق، یہ گرفتاریاں پاکستان اور اسپین کے درمیان حالیہ سفارتی رابطوں کے بعد عمل میں آئیں۔

 اسپین کے دورے کے دوران، وزیر مملکت برائے داخلہ طلال چوہدری نے اپنے اسپینی ہم منصب کے ساتھ اس مسئلے پر تبادلہ خیال کیا اور ملک میں چھپے ہوئے فراریوں کے خلاف فوری کارروائی کی اپیل کی۔  

ملاقات کے بعد، اسپین کے وزیر داخلہ نے متعلقہ قانون نافذ کرنے والے اداروں کو ہدایات جاری کیں، جس کے نتیجے میں دونوں ملزمان کو کامیابی سے گرفتار کر لیا گیا۔  

وزیر مملکت طلال چوہدری نے اسپین کی حکومت کے تعاون کا شکریہ ادا کیا اور باہمی تعاون کو جاری رکھنے کی اہمیت پر زور دیا۔ انہوں نے امید ظاہر کی کہ اسپین میں پناہ لینے والے دیگر فراریوں کو بھی جلد گرفتار کر کے پاکستان حوالے کیا جائے گا۔  

وزارت داخلہ نے بتایا کہ پاکستان نے اسپین میں مقیم 38 مشتبہ افراد کی گرفتاری اور حوالگی کی باقاعدہ درخواست کی ہے۔