شادی سے بچنے کیلیے عین بارات کے وقت دلہا نے خود کو گولی مار کر زخمی کرلیا

ایک حیرت انگیز اور عجیب واقعے میں لاہور کے علاقے سبزہ زار میں ایک دلہے نے اپنی شادی سے بچنے کے لیے خود پر گولی چلا کر ڈکیتی کا ڈرامہ رچایا۔

پولیس کے مطابق، یہ واقعہ دلہا علی حیدر نے شادی کے دباؤ سے بچنے کے لیے خود بنایا۔

ڈی آئی جی آپریشنز نے بتایا کہ پولیس کو ابتدائی طور پر ڈکیتی کی اطلاع ملی، جس میں علی حیدر نامی شخص کو گولی لگنے کی خبر دی گئی۔ تاہم، تحقیقات کے دوران ایک حیران کن کہانی سامنے آئی۔

پولیس کی ایک دن کی تفتیش کے بعد پتہ چلا کہ علی حیدر نے شادی سے بچنے کے لیے پورا واقعہ خود سے ترتیب دیا اور ڈکیتی کا جھوٹا ڈرامہ بنایا۔ علی حیدر نے اعتراف کیا کہ اس نے شادی کے دباؤ سے بچنے کے لیے جھوٹے الزامات لگا کر ہنگامی کال کی تھی۔