سال 2024: کراچی میں اسٹریٹ کرائم کی وارداتوں میں بڑی کمی ریکارڈ

کراچی: سندھ پولیس کی یکم جنوری تا دسمبر 2024 کی سالانہ کارکردگی رپورٹ سامنے آگئی ہے۔

سندھ پولیس نے یکم جنوری تا دسمبر 2024 کی سالانہ کارکردگی رپورٹ آئی جی سندھ غلام نبی میمن کو پیش کردی ہے جب کہ کراچی میں اسٹریٹ کرائم کی وارداتوں میں گزشتہ سال کی نسبت واضح کمی دیکھنے میں آئی ہے۔

رپورٹ کے مطابق سال 2024 میں دوران ڈکیتی مزاحمت پر شہریوں کے قتل کے 98 کیسز میں 77 مقدمات کو حل کرتے ہوئے 112 ڈکیت گرفتار جب کہ 33 ہلاک ہوئے۔

دوران ڈکیتی شہریوں کو زخمی کیے جانے کے 321 کیسزمیں سے 226 مقدمات کو حل کرتے ہوئے 332 کریمنلز گرفتار جب کہ 36 ہلاک ہوئے۔

سکھر، گھوٹکی، کشمور اور شکارپور کے کچہ ایریاز میں جاری آپریشنز کے نتیجے میں ڈاکوں سے 559 مقابلوں میں 73 ڈاکو ہلاک، 120 زخمی جب کہ 378 گرفتار کیے گئے۔

ڈاکوؤں کے قبضے سے 436 کی تعداد میں مختلف اقسام کا اسلحہ و ایمیونیشن برآمد کیا گیا جب کہ ڈاکوؤں اور کریمنلز سے مقابلوں کے دوران 19 پولیس ملازمان شہید اور31 زخمی ہوئے۔

پولیس نے انٹیلی جینس بیسڈ اطلاعات کے تحت 618 شہریوں کو ہنی ٹریپ سے بچایا۔ صوبے میں جرائم پیشہ عناصر کے خلاف 3864 پولیس مقابلوں میں 1782 جرائم پیشہ گروہوں کو ختم کیا گیا۔

سندھ پولیس کا کہنا ہے کہ 7383 کریمنلز کو موقع پر ہی رنگے ہاتھوں گرفتار کیا گیا جب کہ مجموعی طور پر 342 ڈکیت اور کریمنلز ہلاک اور 21504 گرفتار ہوئے۔