ٹیکسز کے خلاف فلور ملز کی ہڑتال، آٹا بحران کا خدشہ

حکومت کی جانب سے بجٹ میں فلور پر ود ہولڈنگ ٹیکس لگانے کے خلاف فلور ملز نے ہڑتال شروع کرتے ہوئے احتجاج سپلائی اور ملیں بند کردی ہیں جس کے باعث آٹے کے بحران کا خدشہ پیدا ہوگیا ہے۔

پاکستان فلور ملز ایسوسی ایشن کی جانب سے وِد ہولڈنگ ٹیکس کے خلاف کراچی سمیت ملک بھر میں ہڑتال شروع کر دی گئی ہے اور آج سے ملک بھر میں فلور ملز نے گندم کی پسائی کا کام بند کردیا گیا ہے۔

فلور ملزم ایسوسی ایشن ساؤتھ کے چیئرمین عامر عبداللہ نے کہاہے کہ جب تک حکومت ود ہولڈنگ ختم نہیں کرے گی ہم ہڑتال کو جاری رکھیں گے، اس دوران جانوروں کے چوکر کی سپلائی بھی متاثر ہوگی۔

انہوں نے کہا کہ ٹیکس کے نفاذ سے آٹا 10 روپے فی کلو تک مہنگا ہوجائے گا، ہماری ملز میں گندم کی پسائی ود ہولڈنگ کے خاتمے تک نہیں ہوگی کیونکہ یہ ہمارا نہیں حکومت کا کام ہے اور ملز مالکان  تو پہلے ہی ٹیکس دے رہے ہیں۔

دریں اثنا فلور ملز کی جانب سے ہڑتال کے دوران ملک بھر میں سپلائی بند ہونے کی وجہ سے آٹے کے بحران کا خدشہ پیدا ہوگیا ہے۔