بابر اعظم خاموشی سے امریکا سے وطن واپس پہنچ گئے

ٹی ٹوئنٹی ورلڈ کپ 2024 سے باہر ہونے کے بعد پاکستانی کپتان بابر اعظم منگل کے روز خاموشی سے وطن واپس پہنچ گئے ہیں۔ 29 سالہ بلے باز منگل کی صبح لاہور ایئرپورٹ پر پہنچے۔

بابر اعظم، شاداب خان، اور ٹیم کے کئی دیگر افراد نے ٹورنامنٹ کے لیگ مرحلے سے باہر ہونے کے باوجود امریکا میں اپنے قیام کو بڑھا دیا تھا۔

بعد میں، متعدد میڈیا آؤٹ لیٹس نے رپورٹ میں کہا کہ حارث رؤف کے جھگڑے کے بعد کرکٹرز نے مداحوں کے ساتھ اپنی بات چیت محدود کر دی تھی۔ 

میگا ایونٹ میں ٹیم کی مایوس کن کارکردگی کے باعث بابر اعظم اور وکٹ کیپر بلے باز محمد رضوان کی سینٹرل کنٹریکٹ اے کیٹیگری سے تنزلی کا امکان ہے۔

تاہم وائٹ بال کے کپتان چند روز میں پاکستان کرکٹ بورڈ (پی سی بی) کے چیئرمین محسن نقوی سے ملاقات کریں گے۔