چیمپئنز ٹرافی: نیوزی لینڈ جنوبی افریقا کو 50 رنز سے شکست دیکر فائنل میں پہنچ گیا

نیوزی لینڈ نے جنوبی افریقا کو آئی سی سی چیمپئنز ٹرافی کے دوسرے سیمی فائنل میں 50 رنز سے شکست دے کر فائنل میں رسائی حاصل کرلی۔

نیوزی لینڈ نے لاہور کے قذافی اسٹیڈیم میں کھیلے گئے میچ میں جنوبی افریقا کے خلاف ٹاس جیت کر پہلے بیٹنگ کا فیصلہ کیا۔

پہلے کھیلتے ہوئے نیوزی لینڈ نے 6 وکٹوں کے نقصان پر 362 رنز بنائے، جواب میں جنوبی افریقا کی  ٹیم 50 اوورز میں 9 وکٹوں کے نقصان پر 312 رنز بناسکی۔

نیوزی لینڈ کی جانب سے اس سے قبل راچن رویندرا اور کین ولیمسن نے شاندار سنچریاں بنائیں، دونوں نے دوسری وکٹ پر 164 رنز کی شراکت قائم کی۔

رویندرا نے 108 رنز بنائے اور ان کی اننگز میں ایک چھکا اور تیرہ چوکے شامل ہیں۔ کین ولیمسن نے بھی 2 چھکوں اور 10 چوکوں کی مددسے 102رنزکی اننگزکھیلی، آخر میں ڈیرل مچل اور گلین فلپس نے بھی ہاتھ دکھائے ، ڈیرل مچل 49رنزبناکرآٹ ہوئے اور فلپس 49 رنز بنا کر ناقابل شکست رہے۔