چیمپئنز ٹرافی میں شکست کے بعد آفریدی کا محسن نقوی کو اہم مشورہ

سابق ٹیسٹ کپتان شاہد خان آفریدی نے کہا ہے کہ پی سی بی کے چیئرمین محسن نقوی کو اپنے تین عہدوں میں سے کسی ایک کا انتخاب کرنا ہوگا۔

کراچی میں اپنی این جی او کے پروگرام میں اظہار خیال کرتے ہوئے شاہد خان آفریدی نے کہا کہ چیمپینز ٹرافی کی اختتامی تقریب میں آئی سی سی کا میزبان کو اسٹیچ پر نہ بلانا بڑا سوال ہے۔

انہوں نے کہا کہ دورہ نیوزی لینڈ کے لیے محمد رضوان کوٹی ٹونٹی ٹیم کا کپتان ہونا چاہیے تھا، میرٹ پر فیصلے نہیں ہوتے تو مسئلہ حل نہیں ہوتا ،کھلاڑیوں کی واپسی کا کوئی طریقہ کار نہیں ہے، جنہیں ٹی ٹوئنٹی سے نکالا وہ مستقبل میں دوبارہ ٹی ٹوئنٹی کرکٹ میں ہونگے۔

انہوں نے کہا کہ پی سی بی کا ہر چیئرمین سمجھتا ہے کہ میں سب کچھ ٹھیک کردوں گا،چہرے کے ساتھ سسٹم کیوں بدلتا ہے، لگتا ہے ابھی تک کرکٹ آئی سی یو میں ہے، بڑے ایونٹ کی تیاری پھر سرجری کی بات کرتے ہیں ،کوچز خود کو بچانے کے لیے کھلاڑیوں پر الزامات لگاتے ہیں، جیتنے پر کریڈٹ کوچز لے جاتے ہیں، کوچز ہار کی زمہ داری نہیں لیتے۔

شاہد آفریدی نے کہا کہ نیوزی لینڈ کے خلاف سیریز میں سلمان آغا ون ڈے کا کپتان ٹھیک ہے ،ٹی ٹوئنٹی کے لیے سلمان آغا کا بطور کپتان انتخاب درست نہیں، محمد رضوان کو ٹی 20 کا کپتان برقرار رکھنا چاہیے تھا۔

آفریدی نے کہا کہ چیئرمین پی سی بی محسن نقوی کام کرنا چاہتے ہیں، محسن نقوی کے پاس کرکٹ کا تجربہ نہیں، محسن نقوی کسی ایک عہدے کا انتخاب کرلیں،محسن نقوی ایک ساتھ تین عہدوں پر کام نہیں کرسکتے، ہوسکتا ہے محسن نقوی کسی ایک عہدے کا انتخاب کرلیں کیونکہ  پی سی بی کی چیئرمین شپ فل ٹائم جاب ہے۔

شاہد خان آفریدی نے کہا کہ مینٹور کی ضرورت جونیئر ٹیم کو ہوتی ہے،سابق ٹیسٹ کپتان راشد لطیف ہمارے لیجنڈ ہیں ، اپنے دور کے وکٹ کیپر بیٹر راشد لطیف کچھ بھی کرسکتے ہیں۔