افغان بلے باز نے چیمپئنز ٹرافی میں اہم اعزاز حاصل کرلیا

لاہور:افغانستان کے اوپنر ابراہیم زادران نے چیمپئنز ٹرافی میں اہم اعزاز حاصل کرلیا، زادران سب سے زیادہ رنز بنانے والے کھلاڑی بن گئے۔

افغانستان نے انگلینڈ کو قذافی اسٹیڈیم لاہور میں گروپ بی کے اہم میچ میں جیت کیلئے 326 رنز کا ہدف دیا، میچ میں افغانستان نے 50 اوورز میں 7 وکٹوں کے نقصان پر 325 رنز بنائے۔

افغان بلے باز نے 146 گیندوں پر 177 رنز کی شاندار اننگز کھیلی جس میں 12 چوکے اور 6 چھکے شامل تھے۔

چیمپئنز ٹرافی میں ابراہم زادران سب سے زیادہ رنز بنانے والے کھلاڑی بن گئے ہیں، انہوں نے ناتھن ایسٹل، بین ڈکٹ، سارو گنگولی اور اینڈی فلاور جیسے لیجنڈ کھلاڑیوں کو بھی مات دیدی۔

ناتھن ایسٹل نے 2004 میں امریکا کیخلاف 145 رنز ناٹ آوٹ بنائے تھے۔بین ڈکٹ نے رواں چیمپئنز ٹرافی میں آسٹریلیا کیخلاف 165 رنز بنائے تھے،

سابق بھارتی بلے باز سارو گنگولی نے 2000 میں جنوبی افریقا کیخلاف 141 رنز بنائے تھے جبکہ زمبابوے کے سابق کپتان اینڈی فلاور نے 2002 میں بھارت کیخلاف 145 رنز بنائے تھے ۔

مزید برآں یہ اننگز ابراہیم زادران کا بہترین انفرادی اسکور بھی بن گئی ہے جو اس سے پہلے 162 رنز تھا، انہوں نے یہ اسکور 2022 میں سری لنکا کیخلاف بنایا تھا۔