معروف کرکٹر کا آئی پی ایل چھوڑ کر پی ایس ایل کھیلنے کا اعلان

جنوبی افریقا کی ٹیم کے سابق کپتان فاف ڈو پلیسی نے آئی پی ایل کو چھوڑ کر پی ایس ایل کھیلنے کا اعلان کردیا۔

فاف نے اعلان کیا ہے کہ وہ آئندہ انڈین پریمیئر لیگ (آئی پی ایل) میں شرکت نہیں کریں گے۔ آئی پی ایل کا اگلا ایڈیشن 2026 کے ٹی ٹوئنٹی ورلڈ کپ کے بعد منعقد ہونا ہے، تاہم ڈو پلیسی نے اس بار نیلامی میں نام نہ دینے کا فیصلہ کیا ہے۔

ذرائع کے مطابق تجربہ کار بیٹر نے پاکستان سپر لیگ (پی ایس ایل) کے گیارہویں سیزن میں دستیابی کی باضابطہ تصدیق کر دی ہے، جسے وہ اپنے کیریئر کا نیا مرحلہ قرار دے رہے ہیں۔

فاف ڈو پلیسی نے یہ اعلان انسٹاگرام پر ایک جذباتی پوسٹ کے ذریعے کیا، جس میں انہوں نے آئی پی ایل کے ساتھ اپنی 14 سالہ وابستگی کو یاد کرتے ہوئے کہا کہ لیگ نے ان کے کھیل کو شکل دینے میں اہم کردار ادا کیا۔

انہوں نے کہا کہ وہ آئی پی ایل میں اپنی طویل موجودگی کے بعد اب ایک نئی لیگ میں چیلنج قبول کرنے کے منتظر ہیں۔

سابق کپتان کے مطابق وہ پی ایس ایل کے نئے سیزن میں بھرپور انداز میں ایکشن میں دکھائی دیں گے۔