نسیم شاہ نے مفت خوروں کو ہری جھنڈی دکھا دی

پاکستان کرکٹ ٹیم کے نوجوان فاسٹ بولر نسیم شاہ نے چیمپئنز ٹرافی کے آغاز سے قبل ہی اپنے مداحوں سے ایک اہم معاملے پر معذرت کر لی ہے۔

انہوں نے ٹکٹوں کی محدود دستیابی کے باعث پیش آنے والی مشکلات کا ذکر کرتے ہوئے مداحوں سے تعاون کی درخواست کی ہے۔

پی سی بی پوڈ کاسٹ میں گفتگو کرتے ہوئے نسیم شاہ نے کہا کہ بھائیوں، ہمیں لوگوں کو تین سے چار ٹکٹ ہی ملتے ہیں اور دو سو سے تین سو لوگ طلب گار ہوتے ہیں۔

انہوں نے مزید کہا کہ براہ مہربانی ناراض نہ ہوا کریں، ہمیں بعض اوقات فیملی کو بھی منع کرنا پڑتا ہے۔ مجبوری ہے، سب کو خوش نہیں رکھ سکتے، بس ٹکٹ نہ مانگا کریں۔

نسیم شاہ نے اپنی گفتگو میں چیمپئنز ٹرافی کے لیے ٹیم کی تیاری اور جوش کا بھی ذکر کیا۔ انہوں نے کہا کہ ہم چیمپئنز ٹرافی کے لیے پرجوش اور تیار بھی ہیں۔ شائقین یہاں اسٹارز کو کھیلتا ہوا دیکھیں گے۔

نسیم شاہ کی جانب سے یہ معذرت اس لیے بھی اہمیت رکھتی ہے کیونکہ کھلاڑیوں کو اکثر ٹکٹوں کے لیے مداحوں کے دباؤ کا سامنا کرنا پڑتا ہے۔

ایسے میں نسیم شاہ کا یہ اقدام ان کے مداحوں کے ساتھ ان کے قریبی تعلق کو ظاہر کرتا ہے۔