پاکستان شاہینز نے بھارت کو شکست دے کر سیمی فائنل میں جگہ بنالی

دوحا: ایشیا کپ رائزنگ اسٹارز کے اہم گروپ میچ میں پاکستان شاہینز نے بھرپور کارکردگی دکھاتے ہوئے بھارت اے کو باآسانی شکست دے دی اور سیمی فائنل میں جگہ بنا لی۔

تفصیلات کے مطابق قطر کے دارالحکومت دوحا میں کھیلے گئے میچ میں پاکستان شاہینز نے ٹاس جیت کر پہلے فیلڈنگ کا انتخاب کیا، جو ٹیم کے لیے نہایت مؤثر ثابت ہوا۔

بھارت اے کی پوری ٹیم 19 اوورز میں صرف 136 رنز پر ڈھیر ہوگئی۔ سوریا ونسی 45 اور نمن دھیر 35 رنز کے ساتھ نمایاں رہے، جبکہ باقی بیٹنگ لائن صرف 45 رنز کا اضافہ کرکے آٹھ وکٹیں گنوا بیٹھی۔

پاکستان کی جانب سے شاہد عزیز نے شاندار بولنگ کا مظاہرہ کرتے ہوئے صرف 24 رنز کے عوض 3 وکٹیں حاصل کیں۔ معاذ صداقت اور سعد مسعود نے دو، دو جبکہ سفیان مقیم، عبید شاہ اور احمد دانیال نے ایک، ایک وکٹ اپنے نام کی۔

ہدف کے تعاقب میں معاذ صداقت نے جارحانہ مگر ذمہ دارانہ بیٹنگ کرتے ہوئے بھارتی بولرز کی جم کر پٹائی کی اور  47 گیندوں پر 79 رنز کی ناقابلِ شکست اننگز کھیلی، جس میں 7 چوکے اور 4 چھکے شامل تھے۔

پاکستان شاہینز نے مطلوبہ ہدف 13.2 اوورز میں صرف دو وکٹوں کے نقصان پر پورا کر لیا۔ فائق 16 رنز بنا کر ناٹ آؤٹ رہے، جبکہ محمد نعیم نے 14 اور یاسر نے 11 رنز کی اننگز کھیلی۔

پاکستان شاہینز کی ایونٹ میں یہ مسلسل دوسری کامیابی ہے، شاہینز اپنا تیسرا اور آخری گروپ میچ 18 نومبر کو متحدہ عرب امارات کے خلاف کھیلیں گے۔