پی ایس ایل 9 : عمر اکمل، شرجیل اور احمد شہزاد پر عدم اعتماد کا اظہار

پی ایس ایل کی کوئٹہ گلیڈی ایٹر کے ڈائریکٹر معین خان نے احمد شہزاد، شرجیل خان  اور عمر اکمل پر عدم اعتماد کا اظہار کرتے ہوئے کہا ہے کہ یہ سب  بڑے نام ضرور ہیں اور ان کی پرفارمنس بھی ہوگی  لیکن اس بار یہ  ہمارے پلان کا حصہ نہیں۔

لاہور میں ایک تقریب سے خطاب کرتے ہوئے معین خان نے واضح کیا کہ ابھی سپلمپنٹری کیٹگری میں دو کھلاڑیوں کو جنوری میں ڈرافٹ کے ذریعے منتخب کرنا ہے، کوشش کریں گے کہ اپنی کمبی نیشن کے لحاط سے ان کھلاڑیوں کا چناؤ کریں جن کے آنے سے ٹیم کی قوت میں مزید اضافہ ہو۔

معین خان نے احمد شہزاد ، عمر اکمل اور شرجیل خان کی ڈومیسٹک میں پرفامنس کے باوجود انتخاب نہ ہونے کے سوال کا جواب دیتے ہوئے واضح کیا کہ عمر اکمل، احمد شہزاد اور شرجیل خان کو سپلمنٹری پک میں نہیں لیں گے۔

انہوں نے کہا کہ اس میں کوئی شک نہیں کہ تینوں بڑے کھلاڑی ہیں اور اُن کی قابلیت سے بھی انکار نہیں مگر اس بات ہمارے گیم پلان کے حساب سے ان تینوں کی جگہ نہیں بنتی، رواں سیزن کیلیے جس اسکواڈ کا انتخاب کیا اُس سے امیدیں وابستہ ہیں اور امکان ہے کہ ہم فائنل کھیلیں۔

سابق کپتان نے کہا کہ پاکستان سپرلیگ اب ایک مقبول برانڈ بن چکاہے، جس کے پرفارمر کو دنیا بھر میں پذیرائی ملتی ہے۔ جتنے بھی بڑے نام ہیں وہ اس میں کھیل چکےہیں۔  پی ایس ایل نوجوان کھلاڑیوں کے لیے خود کو منوانے کا بہترین پلیٹ فارم ہے۔

ٹیم اونر ندیم عمر نے کہا کہ  اس بار بہت سوچ سمجھ کر کھلاڑیوں کا انتخاب کیاہے، کوشش ہوگی کہ اچھی پلاننگ کے ساتھ ہر میچ کھیلیں،سرفراز احمد کی صورت میں ہمارے پاس ایک قابل کپتان موجود ہے، ماضی میں کچھ غلطیاں ہوتی رہی ہیں، اس بار چاہتےہیں کہ ٹرافی کے ساتھ اپنے فینز کے دل بھی جیتیں۔