سفیان مقیم نے ٹی ٹوئنٹی میں پاکستان کے لیے تاریخ رقم کردی

قومی کرکٹ ٹیم کے اسپنر سفیان مقیم نے منگل کو کوئنز اسپورٹس کلب میں سیریز کے دوسرے ٹی ٹوئنٹی میں شاندار بولنگ کرتے ہوئے 3 رنز دے کر 5 کھلاڑیوں کو آئوٹ کرکے تاریخ رقم کردی۔

سفیان مقیم نے T20Is میں پاکستان کی جانب سے بہترین بولنگ کے اعداد و شمار کا نیا ریکارڈ قائم کیا، انہوں نے عمر گل کے ریکارڈ کو بھی توڑ دیا، عمر گل نے 6رنز کے عوض 5کھلاڑیوں کو آئوٹ کیا تھا۔

عمر گل نے یہ کارنامہ دو مرتبہ انجام دیا، پہلی بار 2009 کے ٹی ٹوئنٹی ورلڈ کپ کے سیمی فائنل میں نیوزی لینڈ کے خلاف اور پھر 2013 میں جنوبی افریقہ کے خلاف بھی تاریخ دہرائی۔

واضح رہے کہ آج کے میچ کی جیت کے ساتھ پاکستان نے سیریز میں ناقابل تسخیر برتری حاصل کر لی ہے ، اور تیسرا اور آخری T20I اسی مقام پر 5 دسمبر کو کھیلا جائے گا۔