ایم ایم اے چیمپئن شپ، پاکستانی فائٹرز نے بھارتیوں کو شکست دے دی

لاہور میں ایم ایم اے چیمپئن شپ میں پاکستانی فائٹرز نے بھارتی حریف کو شکست دے کر فاتحانہ آغاز کردیا۔

لاہور میں ہونے والی کمبیٹ مکسڈ مارشل آرٹس (ایم ایم اے) ایشین چیمپئن شپ کے پہلے دن چار پاکستانی فائٹرز نے اپنے مخالفین کے خلاف فتح حاصل کی۔

پاکستانی ایتھلیٹس عباس خان، ضیاء مشوانی، اسماعیل خان، اور رضوان علی نے جیت حاصل کی جبکہ عاقب اعوان کو شکست کا سامنا کرنا پڑا۔ ایونٹ میں پاکستانی اسٹار رضوان علی اور ہندوستانی ایم ایم اے کے تجربہ کار سری کانت شیکھر کے درمیان ایک سنسنی خیز مقابلہ ہوا، جس کا اختتام علی نے شیکھر کو ناک آؤٹ کرنے کے ساتھ کیا۔

ایک اور قابل ذکر مقابلہ پاکستان کے ضیا مشوانی اور بھارت کے بھرت کھنڈرے کے درمیان بینٹم ویٹ کا مقابلہ تھا۔پاکستانی ایم ایم اے فائٹر نے ہائی وولٹیج مقابلے کے پہلے راؤنڈ میں اپنے بھارتی حریف کو شکست دی۔

پاکستانی فائٹرز کی کامیاب پرفارمنس نے شائقین میں جوش اور فخر کو جنم دیا ہے۔ یہ تقریب اتوار کو لاہور کے ڈی ایچ اے اسپورٹس کمپلیکس میں منعقد ہوئی، جس میں ایشیا بھر سے جنگجوؤں کی مہارت اور صلاحیتوں کا مظاہرہ کیا گیا۔

چیمپئن شپ میں گیارہ ممالک کی بارہ ٹیموں نے حصہ لیا اور ملک میں کھیلوں کے فروغ کے لیے پاکستان کی لگن اور عزم کا اظہار کیا۔