20 گھنٹے سے 12 گھنٹے، کس ملک میں کتنے دورانیے کا روزہ ہوگا؟

رمضان المبارک کے مہینے میں فرزندان اسلام رب کی خوشنودی کے لیے روزے رکھیں گے

ویب ڈیسک

|

1 Mar 2025

رمضان المبارک کے دوران دنیا بھر میں مسلمانوں کے روزے کے اوقات جغرافیائی محل وقوع کے لحاظ سے کافی مختلف ہوں گے، جس کے نتیجے میں مختلف خطوں میں روزے کی مدت میں نمایاں فرق دیکھنے میں آئے گا۔

عرب دنیا میں، الجزائر میں سب سے زیادہ لمبے دورانیے کا روزہ ہوگا جہاں مسلمان 16 گھنٹے 44 منٹ تک روزہ رکھیں گے۔ اس کے برعکس، صومالیہ میں روزے کا دورانیہ سب سے کم، یعنی صرف 13 گھنٹے ہوگا۔

زیادہ تر عرب ممالک میں اس سال روزے کے اوقات 16 سے 17 گھنٹے کے درمیان متوقع ہیں، جو مقام کے لحاظ سے مختلف ہوں گے۔

سویڈن، ناروے اور فن لینڈ جیسے ممالک میں کچھ علاقوں میں روزے کا دورانیہ 20 گھنٹے سے زیادہ ہوگا۔

سویڈن کے شہر کیرونا میں سورج افق سے صرف چند منٹ کے لیے غائب ہوتا ہے، جبکہ کچھ شمالی مقامات پر سورج غروب ہی نہیں ہوتا۔

گرین لینڈ کے دارالحکومت نوک میں بھی روزے کا دورانیہ 20 گھنٹے تک ہوگا، جس کی وجہ "مڈنائٹ سن" کا مظاہرہ ہے، جو آرکٹک سرکل کے قریب والے خطوں میں طویل دن کی روشنی کا باعث بنتا ہے۔

آئس لینڈ میں روزے کا دورانیہ تقریباً 19 گھنٹے 59 منٹ ہوگا، جبکہ فن لینڈ میں یہ مدت 19 گھنٹے 9 منٹ ہوگی۔ یہی صورتحال کینیڈا اور الاسکا جیسے دیگر شمالی خطوں میں بھی ہوگی۔

دوسری طرف جن ممالک میں دن کی روشنی کا دورانیہ کم ہوتا ہے وہاں پر 12 سے 13 گھنٹے کا روزہ رکھا جائے گا۔

برازیل، زمبابوے، پاکستان میں روزے کا دورانیہ 12 سے 13 گھنٹے کے درمیان ہوگا۔ جنوبی افریقہ کے شہر جوہانسبرگ اور کیپ ٹاؤن، پیراگوئے کے سیوڈاڈ ڈیل ایسٹے، اور یوراگوئے کے مونٹیویڈیو جیسے شہروں میں روزے کا دورانیہ تقریباً 11 سے 12 گھنٹے ہوگا۔

ارجنٹائن کے شہر بیونس آئرس اور نیوزی لینڈ کے شہر کرائسٹ چرچ میں روزے کا دورانیہ تقریباً 12 گھنٹے ہوگا، جبکہ چلی کے شہر کنگ اسکاٹ میں روزے کا دورانیہ سب سے کم، یعنی 11 سے 12 گھنٹے ہوگا۔

طویل ترین روزے

سویڈن میں روزے کا دورانیہ 20 گھنٹے 30 منٹ

ناروے میں 20 گھنٹے 30 منٹ

فن لینڈ میں 19 گھنٹے 9 منٹ

آئس لینڈ میں 19 گھنٹے 59 منٹ

گرین لینڈ میں 20 گھنٹے

کینیڈا میں 16.5 گھنٹے

الجزائر میں 16 گھنٹے 44 منٹ

اسکاٹ لینڈ میں ساڑھے 16 گھنٹے

سوئٹزرلینڈ 16.5 گھنٹے

اٹلی میں ساڑھے 16 گھنٹے

اسپین میں 16 گھنٹے