بھارت میں 14 سالہ بیٹے نے پیسے نہ دینے پر باپ کو جلا ڈالا

بھارت میں ایک المناک واقعہ پیش آیا جہاں ایک 14 سالہ بیٹے نے اپنے والد کو زندہ جلا دیا۔ 

یہ واقعہ فرید آباد کے علاقے اجے نگر میں پیش آیا، جہاں ایک باپ اور بیٹا کرائے کے ایک کمرے کے گھر میں رہتے تھے۔ باپ نے اپنے بیٹے کو پیسے چوری کرنے کے شبے میں ڈانٹا، جس پر بیٹا طیش میں آگیا۔

پولیس کے مطابق، مکان مالک ریاض الدین نے شکایت درج کروائی کہ رات تقریباً 2 بجے اس نے باپ محمد علیم کی چیخنے کی آوازیں سنیں۔ جب وہ کمرے پر پہنچا تو دروازہ بند تھا۔

 مکان مالک اور پڑوسیوں نے بالکنی سے دیکھا تو معلوم ہوا کہ کمرے کا دروازہ اندر سے بند تھا اور محمد علیم آگ میں جل رہا تھا۔

دروازے کو کھولنے کی کوشش کی گئی، لیکن علیم شدید جھلس چکا تھا اور موقع پر ہی اس کی موت واقع ہوگئی۔ بیٹا واقعہ کے بعد فرار ہوگیا، لیکن بعد میں پولیس نے اسے حراست میں لے لیا۔

پولیس کا کہنا ہے کہ علیم نے اپنے بیٹے کو جیب سے رقم چوری کرنے پر ڈانٹا تھا، جس کے بعد بیٹے نے غصے میں آکر اپنے والد کو آگ لگا دی۔