برطانیہ میں انسانی اسمگلنگ میں ملوث بھارتی شہری گرفتار

برطانیہ میں انسانی اسمگلنگ میں ملوث ہونے کے الزام میں ایک 29 سالہ بھارتی شہری کو گرفتار کر لیا گیا ہے۔

برطانوی میڈیا رپورٹس کے مطابق نیشنل کرائم ایجنسی (NCA) اور ویسٹ مڈلینڈز پولیس نے مشترکہ کارروائی کرتے ہوئے برمنگھم کے علاقے ہینڈزورتھ میں واقع ایک گھر پر چھاپہ مارا، جہاں سے ملزم کو حراست میں لیا گیا۔

حکام کا کہنا ہے کہ گرفتار شخص پر غیر قانونی طور پر لوگوں کو برطانیہ لانے میں سہولت فراہم کرنے کا شبہ ہے۔ ملزم اس وقت پولیس تحویل میں ہے اور اس سے مزید تفتیش جاری ہے۔

کارروائی کے دوران پولیس نے متعدد الیکٹرانک آلات بھی قبضے میں لے لیے ہیں تاکہ اسمگلنگ نیٹ ورک اور اس کے ممکنہ ساتھیوں کے بارے میں شواہد اکٹھے کیے جا سکیں۔

برطانوی حکام کے مطابق ملزم ایک ایسے مجرمانہ گروہ کا حصہ ہو سکتا ہے جو غیر قانونی طریقوں سے افراد کو برطانیہ پہنچانے میں ملوث ہے۔ پولیس کا کہنا ہے کہ یہ گرفتاری غیر قانونی امیگریشن کے خلاف جاری کریک ڈاؤن کا حصہ ہے۔