بی جے پی رہنما کی بس کو حادثہ، مسافر جلکر بھسم ہوگئے

بھارتی ریاست مدھیا پردیش میں مودی جماعت کے رہنما دھرمندر کی زیر ملکیت مسافر بس کو حادثہ پیش آیا جس میں 13 افراد ہلاک اور 18 زخمی ہوگئے۔

بھارتی میڈیا کے مطابق بی جے پی رہنما کی زیر ملکیت گاڑی میں تیس مسافر سوار تھے جو گونا سے آرون جارہی تھی، اس دوران وہ ہائی وے پر ٹرک سے ٹکرائی جس کے بعد اُس میں خوفناک آگ بھڑک اٹھی۔

ذرائع کے مطابق حادثے کا شکار ہونے والی بس کی فٹنس اور انشورنس ایکسپائر ہوچکی تھی لیکن پھر بھی مسافروں کی زندگیوں کو خطرے میں ڈال کر اسے چلایا جا رہا تھا جب کہ 2021 سے ٹیکس بھی ادا نہیں کیا گیا۔

ذرائع کے مطابق بی جے پی رہنما کی گاڑی کا پولیس نے تعلقات کی وجہ سے چالان کیا اور نہ ہی کوئی کارروائی عمل میں لائی گئی۔

وزیراعلیٰ مدھیا پردیش موہن یادو نے حادثے پر تعزیت کا اظہار کرتے ہوئے تحقیقات کا حکم دیدیا جب کہ حکومت کی جانب سے ہلاک ہونے والوں کے لواحقین کو فی کس 4 لاکھ روپے اور ہر ایک زخمی کے لیے 50 ہزار روپے معاوضے کا اعلان کیا ۔