چین کا ایران امریکا جنگ میں پاکستان کے کردار کا اعتراف

چین نے ایران جنگ کے خاتمے کے لیے پاکستان کے کردار کو سراہتے ہوئے کہا ہے کہ بیجنگ خطے میں امن کے قیام کے لیے پاکستان کی “منصفانہ اور متوازن” سفارتی کوششوں کی حمایت کرتا ہے۔

چینی وزارتِ خارجہ کے مطابق پاکستان خطے میں کشیدگی کم کرنے اور جنگ کے خاتمے کے لیے مثبت کردار ادا کررہا ہے، جبکہ چین اسلام آباد کی سفارتی کاوشوں کو اہم سمجھتا ہے۔

چینی حکام کا کہنا ہے کہ پاکستان نے مشرقِ وسطیٰ کی صورتحال میں تحمل اور توازن کا مظاہرہ کیا ہے اور مذاکرات کے ذریعے مسائل کے حل پر زور دیا ہے۔ چین نے اس امید کا اظہار بھی کیا کہ تمام فریق جنگ بندی اور بات چیت کے راستے کو اختیار کریں گے تاکہ خطے میں استحکام بحال ہوسکے۔

رپورٹس کے مطابق چین اور پاکستان اس سے قبل بھی ایران سے متعلق کشیدگی میں سفارتی رابطے اور امن تجاویز پر مشاورت کرتے رہے ہیں۔ دونوں ممالک نے متعدد مواقع پر خطے میں جنگ کے بجائے مذاکرات اور سفارتکاری کو ہی واحد حل قرار دیا ہے۔