جعفر ایکسپریس واقعے پر چین کا ردعمل سامنے آگیا

چین نے بلوچستان کے علاقے میں ٹرین پر دہشت گردوں کے حملے اور مسافروں کو یرغمال بنائے جانے کے واقعے کی شدید الفاظ میں مذمت کرتے ہوئے اپنی گہری تشویش کا اظہار کیا ہے۔

چین کی وزارت خارجہ کے بیان میں اس حملے میں قیمتی جانوں کے نقصان پر افسوس کا اظہار کیا گیا ہے۔ بیان میں چین نے پاکستان کے ساتھ سیکیورٹی تعاون کو مزید مضبوط بنانے کی خواہش ظاہر کی ہے اور کہا ہے کہ وہ دہشت گردی کے خلاف مشترکہ جنگ میں مزید تعاون کے لیے تیار ہے۔

چینی وزارت خارجہ نے پاکستان کے ساتھ سیکیورٹی تعلقات کو مستحکم کرنے اور ایسے حملوں کا مقابلہ کرنے کے لیے تعاون کی پیشکش کی ہے۔ بیان میں مزید کہا گیا کہ چین پاکستان کے ساتھ تمام ممکنہ ذرائع استعمال کرے گا تاکہ دہشت گردی کے خلاف مؤثر اقدامات کیے جا سکیں اور دونوں ممالک کی سلامتی کو مزید مضبوط بنایا جا سکے۔

واضح رہے کہ پاک فوج کے جوانوں نے بروقت کارروائی کرتے ہوئے ٹرین پر حملہ کرنے والے تمام دہشت گردوں کو ختم کر دیا اور 190 مسافروں کو محفوظ طور پر بازیاب کرایا۔

چین نے پاکستان کی جانب سے کی گئی اس کارروائی کی تعریف کی ہے اور دونوں ممالک کے درمیان سیکیورٹی تعاون کو مزید بہتر بنانے پر زور دیا ہے۔