جرمنی، کارکنوں کی مزدوری میں بڑا اضافہ

برلن: جرمن حکومت نے کارکنوں کی فی گھنٹہ مزدوری 14.60 یورو کرنیکی منظوری دیدی، ایک دہائی پہلے کم از کم فی گھنٹہ اجرت کا نظام اپنانے کے بعد سے یہ سب سے بڑا اضافہ ہے۔

عالمی میڈیا رپورٹ کے مطابق جرمن وزیر محنت بیربل باس نے بتایا کہ وفاقی کابینہ نے ملکی کارکنوں کی کم از کم فی گھنٹہ اجرت بڑھانے کی منظوری دے دی ہے اور اس میں پہلی بار اتنا زیادہ اضافہ کیا گیا ہے جتنا ماضی میں کبھی دیکھنے میں نہیں آیا ۔

وزیر محنت کے مطابق اجرت میں نیا اضافہ دو مراحل میں کیا جائے گا۔میڈیا رپورٹ میں مزید بتایا گیا ہے کہ اس وقت ملک میں جزوقتی ملازمتیں کرنے والے کارکنوں کے لئے کم از کم فی گھنٹہ اجرت 12.82 یورو (14.90 ڈالر کے برابر)بنتی ہے۔

 اضافے کے پہلے مرحلے میں فی گھنٹہ اجرت کی یہ رقم یکم جنوری 2026 سے بڑھا کر 13.90 یورو کی جائے گی، اس کے بعد یکم جنوری 2027 سے مزید اضافہ کر کے یہی فی گھنٹہ اجرت 14.60 یورو کر دی جائے گی۔

وزیر محنت نے وفاقی کابینہ کی طرف سے منظوری کے بعد کہا کہ جرمنی میں اب کئی ملین کارکنوں کو ان کی محنت کا واضح طور پر زیادہ معاوضہ ملے گا۔

 اس اضافے پر عمل درآمد چونکہ دو مراحل میں ہو گا اس لئے جرمن آجر بھی اس قابل ہوں گے کہ دو سال کے عرصے میں اپنے ان اضافی اخراجات کو مناسب انداز میں برابر تقسیم کر سکیں۔

برلن میں چانسلر فریڈرش میرس کی قیادت میں مخلوط حکومت ہے جو میرس کی قدامت پسند یونین جماعت سی ڈی یو، اس کی ہم خیال باویرین پارٹی سی ایس یو اور مرکز سے بائیں طرف جھکا رکھنے والی سوشل ڈیموکریٹک پارٹی ایس پی ڈی پر مشتمل ہے۔

جرمن حکومت میں جونیئر کولیشن پارٹنر ایس پی ڈی سے تعلق رکھنے والے وفاقی وزیر محنت بیربل باس کے مطابق کم از کم فی گھنٹہ اجرت میں یہ اضافہ زیادہ انصاف پسندی کی طرف بڑا قدم بھی ہے اور ان کارکنوں کی محنت کا اعتراف بھی جو ہر صبح شام ہماری معیشت کو حرکت میں رکھتے ہیں۔