امریکا میں ایک اور افغان شہری دہشت گردی کے الزام میں گرفتار

واشنگٹن: امریکی حکام نے بتایا ہے کہ ٹیکساس میں ایک افغان نژاد شخص کو دہشت گردی کی دھمکی دینے کے الزام میں گرفتار کر لیا گیا۔

مذکورہ شخص کو صدر جو بائیڈن کے پروگرام “آپریشن الائز ویلکم” کے تحت امریکا منتقل کیا گیا تھا۔

محکمہ ہوم لینڈ سیکیورٹی کی اسسٹنٹ سیکریٹری ٹریشا میک لافلن کے مطابق محمد داؤد الکوزئی نامی افغان شہری نے ٹک ٹاک پر ایک ویڈیو شیئر کی تھی، جس میں وہ بظاہر کسی دھماکا خیز آلے پر کام کرتا دکھائی دے رہا تھا۔ حکام کے مطابق اس ویڈیو سے اندازہ ہوتا ہے کہ فورٹ ورتھ کا علاقہ اس کا ممکنہ ہدف تھا۔

الکوزئی کو منگل کے روز ٹیکساس ڈپارٹمنٹ آف پبلک سیفٹی اور ایف بی آئی کے جوائنٹ ٹیررازم ٹاسک فورس نے مشترکہ کارروائی کرتے ہوئے گرفتار کیا۔ اس کے خلاف “دہشت گردی کی دھمکی دینے” کی دفعات کے تحت مقدمہ درج کیا گیا ہے۔

الکوزئی کی گرتاری ایسے وقت میں ہوئی جب اس واقعے کے ایک دن بعد ایک اور افغان شہری رحمان اللہ لکانوال نے واشنگٹن میں معمول کی گشت پر موجود دو نیشنل گارڈ اہلکاروں پر فائرنگ کی، جس سے دونوں شدید زخمی ہو گئے۔

لکانوال کو واردات کے فوراً بعد حراست میں لیا گیا، اور حکام نے اس حملے کو “جان بوجھ کر کیا گیا دہشت گرد اقدام” قرار دیا ہے۔