امریکا نے پاکستان کے ساتھ تجارتی معاہدے کا اعلان کر دیا

واشنگٹن ڈی سی: امریکی صدر ٹرمپ نے پاکستان کے ساتھ تجارتی معاہدہ طے ہونے کا اعلان کردیا۔

امریکا کے صدر ڈونلڈ ٹرمپ نے آج وائٹ ہاؤس میں تجارتی معاہدوں پر مصروفیت کا اعلان کیا ہے۔

 انہوں نے اپنے ایک سوشل میڈیا پیغام میں کہا کہ وہ کئی ممالک کے رہنماؤں سے بات کر چکے ہیں جو مثبت رہی ہے۔

ٹرمپ نے مزید بتایا کہ وہ آج سہ پہر جنوبی کوریا کے تجارتی وفد سے ملاقات کریں گے۔ ان کے بقول، جنوبی کوریا اس وقت 25 فیصد ٹیرف پر ہے لیکن انہوں نے ان ٹیرف کو کم کرنے کی پیشکش کی ہے اور امریکی صدر نے اس بات کی حامی بھر لی ہے۔

ایک اہم پیشرفت کا اعلان کرتے ہوئے ٹرمپ نے بتایا کہ امریکہ نے پاکستان کے ساتھ ایک معاہدہ طے کر لیا ہے جس کے تحت پاکستان اور امریکہ اپنے بڑے تیل کے ذخائر کی ترقی کے لیے مل کر کام کریں گے۔

انہوں نے کہا کہ وہ اس شراکت داری کی قیادت کرنے والی تیل کمپنی کا انتخاب کر رہے ہیں۔ ٹرمپ نے یہ بھی اشارہ دیا کہ "کون جانتا ہے، شاید وہ ایک دن ہندوستان کو تیل بیچ رہے ہوں گے!"

ٹرمپ نے یہ بھی ذکر کیا کہ دیگر ممالک بھی ٹیرف میں کمی کی پیشکش کر رہے ہیں، اور یہ تمام اقدامات امریکہ کے تجارتی خسارے کو بہت بڑے پیمانے پر کم کرنے میں مدد کریں گے۔ 

انہوں نے اعلان کیا کہ اس معاملے پر مکمل رپورٹ مناسب وقت پر جاری کی جائے گی۔ ٹرمپ نے اپنے پیغام کا اختتام اپنے مشہور نعرے "امریکہ کو دوبارہ عظیم بناؤ!" (MAKE AMERICA GREAT AGAIN!) کے ساتھ کیا۔