امریکا سے ڈی پورٹ کیے گئے پاکستانی وطن واپس کب پہنچیں گے؟ تعداد کتنی ہے

امریکی صدر ڈونلڈ ٹرمپ کی جانب سے غیر قانونی تارکین وطن کی واپسی کی پالیسی پر عملدرآمد جاری ہے اور ایک اور جہاز آئندہ ہفتے پاکستان پہنچنے والا ہے جس میں پاکستانی غیر قانونی تارکین وطن شامل ہوں گے۔  

 پاکستانی سفارتخانے کے ذرائع نے بتایا کہ اس جہاز میں 8 پاکستانی شہریوں کو واپس لایا جائے گا۔ ان میں سے صرف 2 افراد کا مجرمانہ ریکارڈ موجود ہے، جب کہ باقی 6 افراد کا کوئی مجرمانہ پس منظر نہیں ہے۔ 

واپس آنے والوں میں جن 2 افراد کا ریکارڈ موجود ہے، ان پر منشیات اور ریپ کے مقدمات درج ہیں۔ ان غیر قانونی تارکین وطن میں رحمان، سلیم، نواز، سلمان، عظیم، خان، اور خالد مسیح نامی شہری شامل ہیں۔  

ان شہریوں کو ایک خصوصی امریکی طیارے کے ذریعے پاکستان کے نور خان ایئربیس پر پہنچایا جائے گا۔  

اس سے قبل، 56 سالہ پاکستانی شہری سید رضوی کو بھی غیر قانونی طور پر امریکا میں رہنے کے الزام میں 25 فروری کو ملک بدر کر دیا گیا تھا۔ 

امریکی خفیہ ادارے فیڈرل بیورو آف انویسٹی گیشن (FBI) نے ان کی تصویر بھی جاری کی تھی۔ رضوی 2017 میں امریکا داخل ہوئے تھے اور وہ ڈیلاس میں مقیم تھے۔ انہیں 31 جنوری کو گرفتار کیا گیا تھا۔  

یہ اقدامات امریکا کی غیر قانونی تارکین وطن کی واپسی کی پالیسی کا حصہ ہیں، جس کے تحت غیر قانونی طور پر رہائش پذیر افراد کو ان کے آبائی ممالک واپس بھیجا جا رہا ہے۔