نیتن یاہو حماس کے ساتھ مذاکرات پر آمادہ، اسرائیلی وفد قطر روانہ ہوگا

یروشلم: اسرائیلی وزیر اعظم بن یامین نیتن یاہو نے غزہ میں جنگ بندی اور یرغمالیوں کی رہائی کے لیے مذاکرات دوبارہ شروع کرنے پر آمادگی ظاہر کی ہے، جس کے بعد اسرائیل کا ایک وفد قطر روانہ کیا جائے گا۔ یہ پیشرفت حماس کی جانب سے فوری مذاکرات کی پیشکش کے بعد سامنے آئی ہے۔

تاہم، نیتن یاہو کا کہنا ہے کہ جنگ بندی معاہدے کے مسودے میں حماس کی جانب سے تجویز کی گئی کچھ تبدیلیاں اسرائیل کے لیے قابل قبول نہیں ہیں۔

نیتن یاہو کے دفتر سے جاری ایک بیان میں بتایا گیا کہ اسرائیل کو قطر کی جانب سے فراہم کردہ تجاویز اور حماس کی مجوزہ تبدیلیوں سے گزشتہ رات آگاہ کیا گیا تھا، جن میں سے کئی نکات پر اسرائیل کو اعتراضات ہیں۔ صورتحال کا جائزہ لینے کے بعد، نیتن یاہو نے قطری دعوت پر مذاکرات کی راہ ہموار کرنے کی ہدایت کی ہے تاکہ یرغمالیوں کی واپسی کے لیے انہی شرائط پر بات چیت آگے بڑھائی جا سکے جن پر اسرائیل پہلے ہی اتفاق کر چکا ہے۔

قطر اور امریکہ کی کوششوں سے یہ مذاکرات ایک ایسے اہم موقع پر متوقع ہیں جب 21 ماہ بعد پہلی بار اسرائیلی قیادت نے اس تنازع کے خاتمے کے لیے نرمی دکھائی ہے۔ الجزیرہ کی رپورٹر ہمدہ سلحوٹ کے مطابق، اب تک نیتن یاہو پر صرف اسرائیلی یرغمالیوں کے اہل خانہ اور یورپی اتحادیوں کی جانب سے دباؤ تھا، لیکن اس بار دباؤ کا اصل منبع براہ راست امریکہ ہے، جس کا اثر نیتن یاہو کی حالیہ مشاورتوں سے واضح ہو رہا ہے۔

اسرائیلی وزیر اعظم آئندہ رات اپنی کابینہ اور سیکیورٹی حکام کے ساتھ مزید مشاورت کے بعد واشنگٹن روانہ ہوں گے، جہاں وہ امریکی سابق صدر ڈونلڈ ٹرمپ کے ساتھ ممکنہ جنگ بندی پر تبادلہ خیال کریں گے۔ امریکی حکام کا کہنا ہے کہ اسرائیل نے ابتدائی طور پر 60 روزہ جنگ بندی کی تجویز پر اصولی آمادگی ظاہر کی ہے جس پر فوری طور پر بات چیت شروع ہو سکتی ہے۔

گزشتہ موقف کے برعکس، جب نیتن یاہو کا اصرار تھا کہ جنگ بندی کی کوئی تجویز اس وقت تک قبول نہیں کی جا سکتی جب تک حماس کا مکمل خاتمہ نہ ہو اور یرغمالیوں کی رہائی یقینی نہ بنا لی جائے، اب وہ اس بات پر غور کر رہے ہیں کہ مذاکرات کے ذریعے اسرائیل کیسے اپنے سیکیورٹی اہداف حاصل کر سکتا ہے۔

اطلاعات کے مطابق آئندہ چند دنوں میں قطری ثالثی میں جنگ بندی پر عملی مذاکرات کا آغاز متوقع ہے، جس سے غزہ میں جاری خونریزی کے خاتمے اور یرغمالیوں کی واپسی کی راہ ہموار ہو سکتی ہے۔