رفح میں فلسطینی پناہ گزینوں کے کیمپ پر اسرائیلی حملے میں کئی شہادتیں

اسرائیلی فورسز نے رفح میں پناہ گزینوں کے کیمپ پر ایک اور حملہ کیا ہے جس کے نتیجے میں مزید 25 کے قریب بے گھر فلسطینی شہید جبکہ درجنوں زخمی ہوگئے۔

اسرائیلی فورسز نے مغربی رفح کے علاقے المساوی میں غزہ سے بے گھر ہونے والے فلسطینیوں کے کیمپ پر منگل کے روز اُس وقت حملہ کیا جب نہتے اور بے گناہ فلسطینی سو رہے تھے۔

الجزیرہ کی رپورٹ کے مطابق غزہ آپریشن کے دوران اسرائیل نے اس علاقے کو محفوظ قرار دیتے ہوئے فلسطینیوں کو یہاں منتقل ہونے کا مشورہ دیا تھا۔ 

حالیہ کارروائی کے بعد میتوں اور زخمیوں کو طبی امداد دینے کیلیے عالمی میڈیکل کور کے فیلڈ اسپتال کو علاقے میں پہنچا دیا گیا ہے۔

اس کارروائی کے بعد رفح میں اسرائیلی بربریت کے نتیجے میں شہید ہونے والے بے گناہ پناہ گزین فلسطینیوں کی تعداد 100 کے قریب پہنچ چکی ہے جبکہ درجنوں زخمی بھی ہیں جن میں سے کئی آگ سے جھلسے ہیں۔