روس کا پاک بھارت کشیدگی پر اہم بیان سامنے آگیا

مقبوضہ کشمیر کے پہلگام علاقے میں 26 بھارتی سیاحوں کے قتل کے بعد پاکستان اور بھارت کے درمیان کشیدگی بڑھ گئی ہے۔ بھارت نے سندھ طاس معاہدہ معطل کرنے سمیت متعدد جارحانہ اقدامات اٹھائے ہیں، جس پر پاکستان نے بھی واضح ردعمل دیا ہے۔  

دونوں ممالک کے درمیان بڑھتی کشیدگی اور اس تنازع پر روس نے بھی اپنا موقف ظاہر کرتے ہوئے دونوں ممالک سے تحمل اور گفت و شنید کی راہ اپنانے کی اپیل کی ہے۔

روسی وزارت خارجہ کے بیان میں کہا گیا ہے کہ "روس پاکستان اور بھارت سے اختلافات کو پرامن طریقے سے حل کرنے اور کشیدگی کم کرنے کی گزارش کرتا ہے۔"

بیان کے مطابق پاکستان کے روسی سفیر خالد جمیل نے روس کے ڈپٹی وزیر خارجہ سے ملاقات کی، جس میں کشمیر میں حالیہ حملے کے بعد کی صورتحال اور خطے میں بڑھتی ہوئی کشیدگی پر بات چیت ہوئی۔

اعلامیے میں کہا گیا ہے کہ روس نے دونوں ممالک کو باہمی تنازعات کو مذاکرات کے ذریعے حل کرنے پر زور دیا۔  

پہلگام حملے کے بعد بھارت کی جانب سے یکطرفہ اقدامات، خاص طور پر سندھ طاس معاہدے کی معطلی، نے خطے میں مزید عدم استحکام پیدا کر دیا ہے۔

پاکستان نے ان اقدامات کو غیر ذمہ دارانہ قرار دیتے ہوئے بین الاقوامی برادری سے مداخلت کی اپیل کی ہے۔  

ماہرین کے مطابق، اگر دونوں ممالک کے درمیان کشیدگی مزید بڑھی تو یہ خطے میں ایک نئے بحران کا باعث بن سکتی ہے۔

روس جیسے اہم کھلاڑیوں کی جانب سے امن کی کوششیں ایک مثبت پیش رفت ہو سکتی ہیں، لیکن بھارت کی جارحانہ پالیسیاں تشویش کا باعث بنی ہوئی ہیں۔