ٹرمپ کی بھارت پر ٹیرف عائد کرنے کی دھمکی

واشنگٹن ڈی سی: امریکی صدر ڈونلڈ ٹرمپ نے ایک بار پھر بھارت کو تجارتی محاذ پر دھمکی دی ہے، ان کا کہنا ہے کہ اگر بھارت نے امریکا کے ساتھ تجارتی معاہدہ نہیں کیا تو اس پر 25 فیصد ٹیرف عائد کر دیا جائے گا۔

صحافیوں سے گفتگو کرتے ہوئے ٹرمپ نے واضح کیا کہ فی الحال امریکا اور بھارت کے درمیان کوئی تجارتی معاہدہ طے نہیں پایا ہے۔

ٹرمپ نے بھارت کو ایک "اچھا دوست" قرار دیا، تاہم ساتھ ہی یہ بھی کہا کہ بھارت نے بنیادی طور پر تقریباً تمام ممالک سے زیادہ ٹیرف وصول کیے ہیں۔ یہ بیان دونوں ممالک کے درمیان جاری تجارتی کشیدگی کو مزید بڑھا سکتا ہے۔

ماضی کے اقدامات اور دھمکیاں

یہ پہلا موقع نہیں جب ٹرمپ نے بھارت پر تجارتی پابندیوں کا عندیہ دیا ہو۔ واضح رہے کہ اپریل 2025 میں صدر ٹرمپ نے بھارتی مصنوعات پر 26 فیصد ٹیرف کے نفاذ کا اعلان کیا تھا، جس پر عملدرآمد جولائی تک کے لیے ملتوی کر دیا گیا تھا۔

اس کے علاوہ، انہوں نے ٹیکنالوجی کمپنی ایپل کو بھی خبردار کیا تھا کہ اگر کمپنی نے اپنے آئی فونز امریکا میں تیار نہیں کیے تو اسے 25 فیصد ٹیرف کا سامنا کرنا پڑے گا۔ ٹرمپ نے یہ بھی دعویٰ کیا تھا کہ انہوں نے کار ساز کمپنی ٹیسلا کا مینوفیکچرنگ پلانٹ بھارت میں لگنے سے رکوادیا تھا۔