ہر پاکستانی شہری کتنے کا مقروض ہوگیا؟ جانیے

وزیر خزانہ محمد اورنگزیب نے اکنامک سروے آف پاکستان 2023-24 پیش کیا جو کہ ایک پری بجٹ دستاویز ہے جس میں سبکدوش ہونے والے مالی سال کے دوران میکرو اکنامک انڈیکیٹرز کی تفصیلات شامل ہیں۔

سروے کے مطابق مارچ 2024 میں جاری مالی سال کے پہلے 9 ماہ میں مجموعی سرکاری قرضہ 67.53 ٹریلین روپے ریکارڈ کیا گیا۔ رپورٹ میں انکشاف ہوا ہے کہ جون 2023 کے آخر میں یہ اعداد و شمار 62.88 ٹریلین روپے ریکارڈ کیے گئے تھے۔

اعداد و شمار اور ہندسوں  سے ظاہر ہوتا ہے کہ 24 مارچ میں کل مقامی قرضہ 43.43 ٹریلین روپے تھا جب کہ بیرونی قرضہ 24.09 ٹریلین روپے تک پہنچ گیا تھا۔ملک کا کُل قرضہ جی ڈی پی کے 74.8 فیصد کے برابر ہے، جس میں بیرونی قرضہ 28.6 فیصد ہے اور ملکی قرضہ جی ڈی پی کا 46.2 فیصد ہے۔

اس طرح ہر پاکستانی مرد، عورت اور بچہ سبکدوش ہونے والے مالی سال کے دوران غیر ملکی اور ملکی قرض دہندگان کے 280,000 روپے کا مقروض ہے۔ اقتصادی سروے گزشتہ سال کے دوران ملک کی اقتصادی کارکردگی کا ایک جامع جائزہ فراہم کرتا ہے اور آنے والے چیلنجوں اور مواقع کا خاکہ پیش کرتا ہے۔

وزیر اعظم شہباز شریف کی زیرقیادت حکومت کو امید ہے کہ وہ سروے کے نتائج کو آئندہ سال اپنی معاشی پالیسیوں اور حکمت عملیوں سے آگاہ کرنے کے لیے استعمال کرے گی۔ وفاقی حکومت مالی سال 2024-25 کے لیے 18.5 کھرب روپے کا بجٹ (آج) بدھ کو قومی اسمبلی میں پیش کرے گی۔