عامر خان کی پاکستان میں فلم ریلیز پر پابندی لگانا سب سے بڑی غلطی تھی، آج تک پچھتاوا ہے، مریم اورنگزیب

پنجاب کی سینئر وزیر مریم اورنگزیب نے دنگل فلم پر پابندی کے فیصلے پر اظہار افسوس کر دیا۔

پنجاب کی سینئر وزیر مریم اورنگزیب نے اپنی وزارت اطلاعات کے دور میں بھارتی فلم دنگل پر پابندی لگانے کے فیصلے پر افسوس کا اظہار کیا ہے۔ ان کا کہنا تھا کہ یہ فلم پاکستان میں ریلیز ہونی چاہیے تھی۔  

حال ہی میں ایک پوڈکاسٹ میں جب ان سے پوچھا گیا کہ انہیں اپنی سیاسی زندگی کے کون سے فیصلوں پر افسوس ہے، تو انہوں نے جواب میں دنگل پر پابندی کو ایک غلط قدم قرار دیا۔ انہوں نے کہا، "مجھے اس فلم پر پابندی نہیں لگانی چاہیے تھی۔"

مریم اورنگزیب نے بتایا کہ جب وہ وزارت اطلاعات کا قلمدان سنبھال رہی تھیں، تو انہوں نے یہ فلم دیکھی تک نہیں تھی۔ ان کا کہنا تھا کہ یہ فیصلہ سنسر بورڈ کی بریفنگ کی بنیاد پر لیا گیا تھا، جس نے فلم کی ریلیز روکنے کی وجوہات بیان کی تھیں۔  

مسلم لیگ (ن) کی رہنما نے کہا کہ وہ فلم ریلیز ہونے کے ڈیڑھ سال بعد اسے دیکھنے کے قابل ہوئیں، تب انہیں احساس ہوا کہ "دنگل" کو پاکستان میں چلنا چاہیے تھا۔ انہوں نے افسوس کا اظہار کرتے ہوئے کہا، "میں اب بھی اس احساس کو اپنے ساتھ لیے پھرتی ہوں۔"

اس سے قبل، بھارتی اداکار اور دنگل اسٹار عامر خان نے ایک انٹرویو میں پاکستان میں فلم پر پابندی کے معاملے پر بات کی تھی۔ انہوں نے دعویٰ کیا تھا کہ پاکستانی سنسر بورڈ نے گیتا فوگٹ کی جیت کے منظر کے بعد فلم سے بھارتی جھنڈا اور ترانہ ہٹانے کا مطالبہ کیا تھا۔ عامر خان کے مطابق، پاکستانی حکام نے دھمکی دی تھی کہ اگر یہ منظر حذف نہیں کیے گئے تو فلم کی نمائش روک دی جائے گی۔  

عامر خان نے کہا تھا کہ "میں نے ڈزنی کو فوراً بتا دیا کہ ہماری فلم پاکستان میں ریلیز نہیں ہوگی۔ جو ہمیں اپنا جھنڈا اور ترانہ ہٹانے کو کہے، ہمارا اس سے کوئی تعلق نہیں۔ میں ایسے کاروبار میں دلچسپی نہیں رکھتا۔"