کراچی: گھروں میں ملازمت کے بہانے چوری کرنے والی دو عادی جرائم پیشہ ماسیاں گرفتار

کراچی کے علاقے جٹ لائن میں بریگیڈ تھانے کی پولیس نے کارروائی کرتے ہوئے گھروں میں ملازمت کے دوران مبینہ طور پر چوری کی وارداتوں میں ملوث دو خواتین کو گرفتار کر لیا۔

پولیس کے مطابق گرفتار خواتین کی شناخت نوشین اور نور فاطمہ کے نام سے ہوئی ہے۔ ملزماؤں کے قبضے سے تقریباً 75 لاکھ روپے مالیت کے بانڈز، ایک لوہے کی تجوری اور 87 ہزار روپے نقد برآمد کیے گئے ہیں۔

تحقیقات کے مطابق ملزمہ نوشین نے چند ماہ قبل ایک شہری کے گھر صفائی کا کام حاصل کیا اور اہل خانہ کا اعتماد جیتنے کے بعد ان کی غیر موجودگی میں مبینہ طور پر چوری کی واردات کی۔ پولیس نے ملزمہ کے فرار کی سی سی ٹی وی فوٹیج بھی حاصل کر لی ہے۔

حکام کا کہنا ہے کہ ملزمہ پہلے بھی جٹ لائن میں زیورات اور نقدی چوری کے ایک مقدمے میں گرفتار ہو چکی ہے۔ دونوں خواتین کے خلاف بریگیڈ اور صدر تھانوں میں مقدمات درج ہیں، جبکہ مزید تفتیش جاری ہے۔