اچھرہ واقعہ، بشری انصاری نے معنی خیز پیغام کے ساتھ ویڈیو شیئر کردی

پاکستانی شوبز انڈسٹری کی سینیئر اداکارہ بشریٰ انصاری نے شاعرِ مشرق علامہ اقبال کے اشعار والی چادر اوڑھ کر ایک ٹی وی پروگرام میں شرکت کی اور اچھرہ واقعے میں ملوث افراد کو ذو معنی پیغام سے تنقید کا نشانہ بنایا۔

بشریٰ انصاری نے حال ہی میں نجی ٹی وی چینل کی رمضان ٹرانسمیشن میں بطورِ مہمان شرکت کی جس کی تصویر اُنہوں نے اپنے آفیشل انسٹاگرام ہینڈل پر پوسٹ کی۔

تصویر میں بشریٰ انصاری کو علامہ اقبال کے اشعار والی چادر پہنے دیکھا جاسکتا ہے جس پر اقبال کے اشعار درج ہیں۔

انہوں نے لکھا کہ اس چاد پر علامہ اقبال کی شاعری لکھی ہے اگر آپ کو اردو پڑھنا آتی ہے تو سمجھ آجائے گی۔

بشریٰ انصاری کا یہاں اشارہ اچھرہ بازار میں خاتون کے ساتھ پیش آئے واقعے کی طرف تھا جس میں حلوہ لباس پر درج ہونے کی وجہ سے مشتعل ہجوم نے خاتون کا گھیراؤ کیا اور اُن پر توہین مذہب کا الزام عائد کیا تھا۔

خوش قسمتی سے پنجاب پولیس کی اے ایس پی شہر بانو نقوی نے موقع پر پہنچ کر خاتون کو مشتعل ہجوم سے بچایا تھا۔