اداکار سیف علی خان حملے میں شدید زخمی، حالت تشویشناک

بالی ووڈ اداکار سيف علی خان اپنے گھر میں ڈاکو کے حملے میں زخمی ہو گئے ہیں۔ واقعہ رات 2 دو بج کر تیس منٹ پر باندرہ (غرب) میں واقع ان کے گھر پر پیش آیا جب وہ اپنی اہلیہ کرینہ کپور اور دیگر اہل خانہ کے ساتھ سوئے ہوئے تھے۔

پولیس کا کہنا ہے کہ گھر والوں کے جاگنے پر ڈاکو فرار ہو گیا اور پولیس اسے تلاش کرنے کی کوشش کر رہی ہے۔

پولیس ایف آئی آر درج کرنے کے عمل میں ہے اور مجرم کو پکڑنے کے لیے متعدد پولیس ٹیمیں تشکیل دی گئی ہیں۔

پولیس کا تبصرہ

ایک سینئر آئی پی ایس افسر نے واقعہ کی تصدیق کرتے ہوئے کہا کہ "سيف علي خان کو لیلاوتی ہسپتال میں داخل کرایا گیا ہے جہاں ان کا علاج جاری ہے۔ ابھی تک یہ واضح نہیں ہے کہ انہیں چھرا گھونپا گیا ہے یا ڈاکو کے ساتھ ہونے والی لڑائی میں زخمی ہوئے ہیں۔ ہم معاملے کی تحقیقات کر رہے ہیں۔ ممبئی کرائم برانچ بھی واقعہ کی متوازی تحقیقات کر رہی ہے۔"

لیلاوتی ہسپتال کے سی او او ڈاکٹر نیرج اٹامن نے کہا، "سيف پر ان کے گھر میں ایک نامعلوم شخص نے حملہ کیا۔ انہیں رات ساڑھے تین بجے لیلاوتی لایا گیا۔ انہیں چھ زخم لگے ہیں جن میں سے دو گہرے ہیں۔ ایک زخم ان کی ریڑھ کی ہڈی کے قریب ہے۔ ہم ان کا آپریشن کر رہے ہیں۔ ان کا آپریشن نیورو سرجن نتن دانگے، کاسمیٹک سرجن لیینا جین اور اینستھیزیا ماہر نیشا گاندھی کر رہے ہیں۔ آپریشن کے بعد ہی نقصان کا اندازہ لگایا جا سکے گا۔"