اداکارہ کی بیٹی نے حوصلہ افزائی کر کے ماں کی دوسری شادی کروائی

پاکستانی شوبز انڈسٹری کی اداکارہ نے انکشاف کیا ہے کہ دوسری شادی کیلیے اُن کی بیٹی نے بہت زیادہ حوصلہ افزائی کی۔

اداکارہ دانیہ انور نے حال ہی میں ایک پوڈ کاسٹ میں شرکت کی اور اپنی زندگی کے اتار چڑھاؤ، دوسری شادی کے بارے میں سوالات کے کھل کر جوابات دیے۔

انہوں نے انکشاف کیا کہ پہلی شادی 19 سال کی عمر میں ہوئی اور 6 سال تک جاری ہے، شوہر کے نشے کی عادت سے ازدواجی تعلقات خراب ہوئے اور پھر تشدد و تضحیک معمول بن گئی تھی جس کے بعد اداکارہ نے رشتہ ختم کرنے کا فیصلہ کیا۔

دانیہ نے کہا کہ طلاق کے بعد انہوں نے کچھ عرصے کے لیے دوبارہ شادی نہ کرنے کا فیصلہ کیا تاہم جلد ہی اُن کی زندگی میں ایک بہترین شخص آیا جس کے ساتھ اُن کے 2 سال تعلق تعلقات رہے۔

اداکارہ کے مطابق بیٹی نے حوصلہ افزائی کی جس کے بعد انہوں نے دوسری شادی کا فیصلہ کیا۔ اُن کے مطابق دوسری شادی اپنی خوشی نہیں بلکہ بچوں کیلیے کی تاہم قدرت نے انہیں خوشیاں بھی عطا کردیں۔

اداکارہ نے یہ بھی بتایا کہ ان کی عمر اب 37 سال ہے، اور وہ اپنی زندگی میں سکون اور خوشی محسوس کرتی ہیں کیونکہ ان کی ساس اور سسر بھی بہت اچھے ہیں جو انکی بہت رہنمائی بھی کرتے ہیں۔